होंडाचे उत्पादन सुरळित

मुंबईः होंडा मोटरसायकल अँड स्कूटर इंडियाने तिच्या राजस्थानातील तापुकारा येथील कारखान्यात उत्पादन सुरळितपणे सुरू असल्याचा दावा केला आहे. कंपनीचे काही कामगार गेल्या आठवड्यापासून नवी दिल्ली येथील जंतरमंतर येथे उपोषणाला बसले आहेत. कामगार संघटना स्थापन करण्यापासून व्यवस्थापन आपल्याला रोखत असल्याचा या कामगारांचा आरोप आहे.

त्याचप्रमाणे तापुकारा कारखान्यातून कमी केलेल्या कामगारांकडून येथील उत्पादन कामगार असंतोषामुळे थंडावल्याचा दावा करण्यात आला होता. तो निराधार असल्याचे कंपनीचे म्हणणे आहे. तापुकारा व माणेसर या दोन्ही कारखान्यांत कामगारांच्या संघटना किंवा समित्या कार्यरत आहेत. त्यामुळे कोणताही संघर्ष निर्माण झाल्यास तो थेट कंपनी व्यवस्थापनाशी होत नाही. कारखान्यांतून कामगारांचे कोणतेही प्रलंबित वाद नाहीत, असेही कंपनीचे म्हणणे आहे.