म. टा. प्रतिनिधी, मुंबई
महाराष्ट्राने त्यांना प्रेम दिले व या प्रेमापोटी त्यांनीही महाराष्ट्राला भरभरून दिले... अशा प्रतिभावंतांचा रंगारंग सन्मान सोहळा गुरुवारी रात्री वांद्र्यातील हॉटेल ताज लॅन्डएन्डमध्ये झाला. 'ईटी एज महाराष्ट्रीयन अॅचिव्हर्स अॅवॉर्ड' या पुरस्कार सोहळ्याचे हे दुसरे वर्ष होते. 'फेमिना' व अॅक्वाव्हाइट यांच्या सहकार्याने हा कार्यक्रम झाला. मुख्यमंत्री देवेंद्र फडणवीस यांच्या पत्नी अमृता फडणवीस, अभिनेत्री राणी मुखर्जी, ज्येष्ठ क्रिकेटपटू सुनील गावस्कर, वर्ल्डवाइक मीडियाचे सीईओ दीपक लांबा, फेमिनाच्या संपादक तान्या चैतन्य, महाराष्ट्र सायबर सेलचे महानिरीक्षक ब्रिजेश सिंह यांच्या प्रमुख उपस्थितीत हा कार्यक्रम झाला. लोकप्रिय अभिनेत्री आलिया भट, 'हाऊ इज द जोश' या संवादासाठी लोकप्रिय असलेला अभिनेता विकी कौशल, राजकुमार राव, अभिनेत्री रीहा चक्रवर्ती, अमृता खानिवलकर, सई ताम्हणकर हे कार्यक्रमाचे मुख्य आकर्षण होते.
चित्रपटसृष्टी, क्रीडाक्षेत्र, विधि व न्याय, बांधकाम, स्टार्टअप, ऑनलाइन अॅप सेवा, लष्करी सेवा, वैद्यकीय सेवा आदी क्षेत्रांत सेवा दिलेल्या ३५ प्रतिभावंतांचा यावेळी सन्मान झाला. आलिया भट हिला 'एण्टरटेनर ऑफ द इयर'पुरस्काराने सन्मानित करण्यात आले. उपस्थितांच्या आग्रहाखातर तिने 'इक कुडी' हे गाणे गाऊन उपस्थितांची वाहवा मिळवली. क्रीडा क्षेत्रातील योगदानासाठी सुनील गावस्कर यांचा दीपक लांबा व अमृता फडणवीस यांच्या हस्ते सन्मान झाला. 'आयुष्यात एज महत्त्वाची असते. ही एज मिळाल्याखेरीज यश मिळत नाही. याचा विचार करावा', असे आवाहन त्यांनी केले.
विकी कौशल याला सर्वोत्तम कलाकाराचा पुरस्कार प्रदान करण्यात आला. 'हाऊ इज द जोश हा संवाद लोकप्रिय झाला असला तरी त्याचे श्रेय कथालेखकालाही जाते आणि तो खऱ्या अर्थाने हे जीवन जगणाऱ्या सैनिकांचा सन्मान आहे', असे तो म्हणाला. संगीतक्षेत्रातील योगदानासाठी बप्पी लाहिरी यांना सन्मानित करण्यात आले. 'या महाराष्ट्राच्या भूमीला मी कायम प्रणाम करतो', अशा भावना त्यांनी व्यक्त केल्या.
'हा पुरस्कार सोहळा महाराष्ट्रासाठी उल्लेखनीय असतो. सलग दुसऱ्या वर्षी राज्यातील प्रतिभावंतांचा सन्मान होताना फेमिनादेखील आमच्या सोबत आहे, ही आनंदाची बाब आहे', असे मत दीपक लांबा यांनी व्यक्त केले. तान्या चैतन्य म्हणाल्या, 'उल्लेखनीय कार्य केलेल्या प्रतिभावंतांचा सन्मान करण्यात फेमिना कायम आघाडीवर असते. यासाठी या पुरस्कार सोहळ्यात सहभागी होणे, ही आनंदाची बाब आहे.'
अन्य महत्त्वाचे पुरस्कार
क्रिएटिव्ह पॉवरहाऊस : एकता कपूर
एण्टरटेनर ऑफ इयर (पुरूष) : राजकुमार राव
सर्वोत्तम कला (महिला) : काजोल
रिअल हिरो : प्रभात रहांगदले (अग्निशमन विभागप्रमुख)
लष्करी सेवा : लेफ्टनंट जनरल (निवृत्त) व्ही. जी. पाटणकर
ग्लोबल आयकन : प्रियांका चोप्रा
सर्वोत्तम क्रीडापटू (पुरूष) : केदार जाधव
सर्वोत्तम क्रीडापटू (महिला) : अंजली भागवत