उत्पादन घसरले

नवी दिल्ली ः औद्योगिक उत्पादन गेल्या चार महिन्यांच्या नीचांकी गेले आहे. त्यामुळे औद्योगिक उत्पादनाचा निर्देशांक फेब्रुवारीअखेर आक्रसून १.२ टक्के झाला आहे. कारखानदारी क्षेत्राने निराशा केल्यामुळे तसेच यंत्रसामग्री व ग्राहकोपयोगी वस्तू यांची मागणी घसरल्याने औद्योगिक उत्पादन खाली आले आहे. औद्योगिक उत्पादन निर्देशांक (आयआयपी) गेल्यावर्षी फेब्रुवारीमध्ये १.९९ टक्के होता.

महागाई ३.९१ टक्के
नवी दिल्ली ः किरकोळ महागाईमध्ये पुन्हा एकदा वाढ पाहण्यास मिळाली आहे. मार्चअखेर आलेल्या आकडेवारीनुसार महागाईचा दर फेब्रुवारीच्या तुलनेत ०.१६ ने वाढून ३.९१ टक्क्यांवर पोहोचला आहे. ही गेल्या पाच महिन्यांतील महागाईची उच्चांकी पातळी आहे. फेब्रुवारीमध्ये किरकोळ महागाईचा दर ३.६५ टक्के होता. दरम्यानच्या काळात इंधनाच्या किमतीत झालेल्या वाढीमुळे महागाई वाढली आहे. डाळी, कपडे आणि फळांचे दरही वाढल्याचे दिसून आले आहे. या कालावधीत साखर आणि भाजीचे दर घटले आहेत. मार्चमध्ये इंधनातील किरकोळ महागाईत ५.५६ टक्के वाढ झाली आहे.

फॉरेन्सिक ऑडिट
नवी दिल्ली ः बँकिंग क्षेत्रात आर्थिक घोटाळ्यांवर नियंत्रण ठेवण्यासाठी इंडियन बँक्स असोसिएशनतर्फे संबंधित बँकेची नामवंत सीए फर्मतर्फे फॉरेन्सिक ऑडिट करण्याचा प्रस्ताव देण्यात आला आहे. त्यासाठी येत्या २५ एप्रिलपर्यंत सीए फर्मकडून अर्ज मागवण्यात आले आहेत. फॉरेन्सिक ऑडिटमध्ये डेटा अॅनालिसिससह क्रेडिट अप्रायझल, फॉरेन ट्रेड डॉक्युमेंट्री अॅनालिसिस, फॉरेन ट्रेड मेकॅनिझम आणि स्विफ्ट ट्रेल आदींचा अंतर्भाव करण्यात येणार आहे. या सीए फर्मना ऑडिटसाठी ई-मेल क्रॅकिंग टूल, मोबाइल कॉल इंटरप्रेटर, बिग डेटा अॅनालायझिंग टूल्स आणि लाय डिटेक्टिंग आदी उपकरणांचा वापर करावा लागणार आहे. त्यामुळे ज्या सीए कंपन्या सीबीआय, सेबी, राज्य पोलिस आणि आयबीएच्या समितीत कार्यरत राहण्यास तयार असतील, त्यांनाच सामावून घेण्यात येणार आहे.