वृत्तसंस्था, नवी दिल्ली
प्राप्तिकर विभागाने बुधवारी जेट एअरवेजच्या मुंबई आणि नवी दिल्लीतील कार्यालयांवर छापे मारले. 'एएनआय'ने दिलेल्या वृत्तानुसार खर्चांची पडताळणी करण्यासाठी छापे मारण्यात आले आहेत. नरेश गोयल प्रवर्तित जेट एअरवेजची आर्थिक स्थिती काहीशी नाजूक असून, गेल्या काही महिन्यांपासून कंपनी अनेक संकटांशी सामना करीत आहे.
प्राप्तिकर विभागाच्या अधिकाऱ्याने दिलेल्या माहितीनुसार जेट एअरलाइन्सच्या बँक खात्यांमधून मोठ्या प्रमाणावर रक्कम अन्यत्र वळती करून घेतल्याच्या आणि ती खर्च केल्याच्या तक्रारीची चौकशी प्राप्तिकर खात्याकडून करण्यात येत आहे. बुधवारची कारवाईही त्या संदर्भात असल्याचे वृत्त आहे. कंपनीच्या चार कार्यालयांवर छापे मारून कारवाई करण्यात आली. या शिवाय कंपनीवरील शुक्लकाष्ठ संपण्याचे काही नाव घेत नसल्याची चर्चा आहे. प्राप्तिकर विभाग जेट एअरवेज आणि गोदरेज बिल्डकॉन यांच्यात झालेल्या एका कराराचीही चौकशी करीत आहे. या व्यवहारातून जेटला १७२५ कोटी रुपये मिळाल्याची चर्चा आहे.
भांडवल बाजार नियामक 'सेबी'नेही कंपनीकडून स्पष्टीकरण मागितले आहे.