आता आधारकार्डने काढा एटीएममधून पैसे!

मटा ऑनलाइन वृत्त। मुंबई

एटीएममधून पैसे काढण्यासाठी आता एटीएम कार्डच्या पिन न दाबताच तुम्हाला पैसे मिळू शकतील… हे एप्रिल फुल नाही तर खरे आहे. एटीएममधून पैसे काढण्यासाठी आधारकार्डचा वापर करु शकता. ट्राझॅक्शनच्या वेळी पिन क्रमांकाऐवजी बायोमॅट्रिक डिटेल्स आणि आधारकार्डचा नंबरवापरून तुम्ही हे करू शकता.

डीसीबी बँकेने देशात पहिल्यांदाच अशा प्रकारे पैसे काढण्याची पद्धत आणली आहे. ‘आम्ही देशातील पहिली एटीएम सेवा सुरू केली आहे. ज्यात एटीएमकार्डच्या ऐवजी आधारकार्डचा वापर करता येऊ शकतो,’ अशी माहिती बॅंकेचे व्यवस्थापकीय संचालक आणि मुख्य कार्यकारी अधिकारी मुरली नटराजन यांनी दिली.

आधारकार्डने कसे काढायचे पैसे?

एटीएम धारकाने एटीएमवर १२ अंकी आधारकार्ड क्रमांक टाकावा किंवा एटीएम स्वाईप करुन पिननंबर ऐवजी बायॉमेट्रिक डिटेल्स टाकावे. तुम्ही देलेली माहिती खरी आहे हे तपासण्यासाठी एटीएम मशीनवर असलेल्या स्कॅनरवर बोटाचे ठसे स्कॅन होतील. ज्यांच्या नावावर अनेक बॅंक खाती आहेत, त्यांना अनेक एटीएमचे पिन लक्षात ठेवता येत नाहीत. अशा लोकांना ही सेवा अत्यंत फायदेशीर असल्याचे नटराजन यांनी सांगितले. यासुविधासाठी खाते धारकांना त्यांचा आधार क्रमांक बॅंकेत नोंदवावा लागेल. सुरुवातीला डीसीबीच्या ग्राहकांसाठीच ही सेवा उपलब्ध केली जाणार आहे.