पीपीएफवरील व्याजदर वाढणार?

ईटी वृत्त, नवी दिल्ली

सर्वसामान्य मध्यमवर्गीयांसाठी भरवशाची गुंतवणूक असणाऱ्या पीपीएफवरील (पब्लिक प्रॉव्हिडण्ट फंड) व्याजदरात वाढ होण्याची शक्यता आहे. पीपीएफसह राष्ट्रीय बचत योजना (एनएससी), किसान विकास पत्र व सीनियर सिटिझन्स सेव्हिंग्ज स्कीमच्या व्याजदरांतही वाढ अपेक्षित आहे. येत्या महिनाअखेरीस या विषयी घोषणा होण्याची शक्यता आहे, अशी माहिती सूत्रांनी दिली.

जानेवारी २०१८पासून पीपीएफवर ७.६ टक्के व्याज मिळत असून दुसऱ्या तिमाहीतही त्यात बदल झाला नाही. जुलै ते सप्टेंबर या तिमाहीसाठी मात्र या व्याजदरात वाढ करण्याचे संकेत सरकारने दिले आहेत. या सर्व योजना सरकारी रोख्यांमधून होणाऱ्या नफ्याशी (गव्हर्न्मेंट बॉण्ड यिल्ड्स) संबंधित असल्याने त्यास अनुसरून ही व्याजदरवाढ करण्यात येणार आहे.

पीपीएफच्या व्याजदरात वाढ झाली नाही तरी तो बचतीचा उत्तम पर्याय आहे, असे मत होलिस्टिक इन्व्हेस्टमेंट प्लॅनर्सचे के. रामलिंगम यांनी व्यक्त केले. सध्याचा ७.६ टक्के व्याजदर हा वाजवी असून पीपीएफमधून मुदतीअंती मिळणारी रक्कम ही करमुक्त असल्याने तसेच त्यातील व्याज हे चक्रवाढ पद्धतीने मिळत असल्याने अन्य ठेवींवरील व्याजाच्या तुलनेत पीपीएफ हा सर्वोत्तम पर्याय आहे, असे ते म्हणाले.