वृत्तसंस्था, मुंबई
जागतिक बाजारांतून मिळालेल्या सकारात्मक संकेतांमुळे देशांतर्गत शेअर बाजारांच्या निर्देशांकांसाठी गुरुवारचा दिवस कमाईचा ठरला. मुंबई शेअर बाजाराचा निर्देशांक (सेन्सेक्स) १५०.५७ अंकांनी वधारून ३५,९२९.६४च्या पातळीवर तर, राष्ट्रीय शेअर बाजाराचा निर्देशांक (निफ्टी) ५३.९५ अंकांनी वधारून १०,७८१.५५च्या स्तरावर पोहोचला.
बँकिंग आणि ऑटो क्षेत्रातील कंपन्यांच्या समभागांची मोठ्या प्रमाणावर खरेदी झाल्याने शेअर बाजाराला मोठा आधार मिळाला. बड्या कंपन्यांमध्ये 'इन्फोसिस'च्या समभागात सर्वाधिक २.८४ टक्क्यांची वाढ नोंदविण्यात आली. बँकिंग, ऑटो आणि एफएमसीजी कंपन्यांच्या समभागांची मोठी खरेदी झाल्यामुळे दोन्ही निर्देशांक वरच्या पातळीवर गेले. निफ्टी ऑटो (०.९६ टक्के), निफ्टी बँक (०.६४ टक्के) आण निफ्टी एफएमसीजीमध्ये ०.६८ टक्क्यांची वाढ नोंदविण्यात आली. निफ्टी मेटल सोडून सर्वच निर्देशांक वरच्या पातळीवर स्थिरावले. 'निफ्टी फिफ्टी'मध्ये इंडियाबुल्स हाउसिंग फायनान्सचा समभाग ५.६४ टक्क्यांनी वधारला. त्यापाठोपाठ बजाज फिनसर्व्ह (२.८५ टक्के), इन्फोसिस (२.८४ टक्के), एचपीसीएल (२.६७ टक्के) आणि मारुती सुझुकीच्या समभागांमध्ये २.६६ टक्क्यांची वाढ नोंदविण्यात आली.
'देशांतर्गत औद्योगिक उत्पादनात ऑक्टोबरमध्ये लक्षणीय वाढ झाली असून उत्पादनाचा दर ८.१ टक्क्यांवर पोहोचला आहे. ही गेल्या ११ महिन्यांतील विक्रमी वाढ आहे. यामुळे गुंतवणूकदारांमध्ये उत्साहाचे वातावरण असून निर्देशांकाला त्याचा लाभ होत आहे,' असे मत बीएनपी परिबास म्युच्युअल फंडाचे अभिजित डे यांनी व्यक्त केले.