सोन्याच्या मागणीत वाढ

पहिल्या तिमाहीत १२३.५ टनांची मागणी; जगभरात मात्र घसरण

वृत्तसंस्था, नवी दिल्ली

नोटाबंदीच्या तडाख्यातून देशाची अर्थव्यवस्था हळूहळू का होईना रूळावर येत असतानाच नव्या वर्षाच्या पहिल्या तिमाहीत सोन्याची मागणीही वाढल्याचे दिसून आले आहे. जानेवारी ते मार्च २०१७ या कालावधीत देशांतर्गत बाजारात सोन्याच्या मागणीत १५ टक्क्यांनी वाढ झाली तर, जगभरातील सोन्याची मागणी १८ टक्क्यांनी घटली आहे.

वर्ल्ड गोल्ड कौन्सिलने नुकतीच जगभरातील सोन्याशी संबंधित आकडेवारी जाहीर केली. त्यानुसार जानेवारी ते मार्च दरम्यान देशात १२३.५ टन सोन्याची मागणी नोंदविण्यात आली. गेल्या वर्षी याच कालावधीत १०७.३ टन सोन्याची मागणी नोंदविण्यात आली होती. जानेवारी ते मार्च २०१७ या कालावधीत जगभरात एकूण १,०३४ टन सोन्याची मागणी नोंदविण्यात आली. ही मागणी गेल्या वर्षी याच कालावधीतील मागणीपेक्षा १८ टक्क्यांनी कमी आहे. जानेवारी ते मार्च या कालावधीत देशातील सोन्याची विक्री ३२,४२० कोटी रुपयांवर गेली आहे. गेल्या वर्षी याच कालावधीत सोन्याच विक्री २७,५४० कोटी रुपये होती.

नोटाबंदीच्या काळात रिझर्व्ह बँकेनेही बँकेतून, एटीएममधून रक्कम काढण्यावर मर्यादा घातल्या होत्या. जूनपासून होणारे मान्सूनचे आगमन आणि जुलैपासून अंमलात येणाऱ्या वस्तू आणि सेवा कराच्या पार्श्वभूमीवर आगामी काळात सोन्याच्या मागणीत आणखी वाढ होईल, असा विश्वासही ‘डब्लूजीसी’ने व्यक्त केला आहे.