नोटाबंदीचा जीडीपीवर परिणाम नाही!

मटा ऑनलाइन वृत्त । नवी दिल्ली

आर्थिक आघाडीवर केंद्रातील मोदी सरकारला मोठा दिलासा मिळाला आहे. नोटाबंदीनंतर देशाच्या विकास दरावर त्याचा मोठा परिणाम होईल असा अंदाज वर्तविण्यात येत होता पण हा अंदाज चुकीचा ठरला असून चालू आर्थिक वर्षाच्या तिसऱ्या तिमाहीत (ऑक्टोबर ते डिसेंबर) ढोबळ राष्ट्रीय उत्पन्नाचा (जीडीपी) वृद्धी दर आधीच्या तिमाहीपेक्षा किंचित घसरून ७ टक्के इतका राहिला आहे.

महत्त्वाचे म्हणजे जीडीपी वृद्धीत भारताने चीनलाही मागे टाकले असून चीनचा याच तिमाहीतील वृद्धी दर ६.८ टक्के इतका राहिला आहे. दरम्यान, २०१८ या अर्थिक वर्षात ७.३ तर २०१९ या आर्थिक वर्षात जीडीपी ७.७ वर जाईल, असे शुभसंकेतही मिळाले आहेत.

नोटाबंदीचा मोठा फटका भारतीय अर्थव्यवस्थेला बसेल. जीडीपी वृद्धी दर घसरून ६.९ ते ६.५ टक्के इतका राहू शकतो, अशी शक्यता अनेक आंतरराष्ट्रीय संस्था तसेच तज्ज्ञांनी व्यक्त केली होती मात्र, हा अंदाज चुकीचा ठरला आहे. केंद्रीय सांख्यिकी विभागाने (सीएसओ) याबाबत आकडेवारी प्रसिद्ध केली असून मोदी सरकारसाठी हे आकडे मोठा दिलासा देणारे आहेत. या आकडेवारीनुसार तिसऱ्या तिमाहीत जीडीपीत ७ टक्के या दराने वाढ झाली आहे. त्याआधीच्या तिमाहीत ७.४ टक्के इतका जीडीपी वृद्धी दर होता.

उत्पादन क्षेत्रात ८.३ टक्के इतका वृद्धी दर राहिला आहे. मार्च २०१७ मध्ये संपत असलेल्या आर्थिक वर्षात वार्षिक विकास दर अंदाजे ७.१ इतका राहणार आहे, असेही सीएसओची आकडेवारी सांगते.