थकित कर्जे ९.४६लाख कोटींवर

नवी दिल्ली : सद्यस्थितीत सार्वजनिक बँकांची एकूण थकीत कर्जे नऊ लाख कोटी रुपयांच्या घरात गेल्याचे शुक्रवारी केंद्र सरकारतर्फे लोकसभेत सांगण्यात आले. कीर्ती आझाद यांनी विचारलेल्या प्रश्नावर केंद्रीय अर्थमंत्री अरुण जेटली यांनी ही माहिती दिली. चालू आर्थिक वर्षाच्या पहिल्या सहा महिन्यांत (एप्रिल ते सप्टेंबर २०१८) सार्वजनिक बँकांनी एकूण थकीत कर्जांपैकी ६० हजार ७१३ कोटी रुपयांची वसुली केल्याचेही जेटली यांनी स्पष्ट केले.

'रिझर्व्ह बँकेच्या आकडेवारीनुसार ३१ मार्च २०१४पर्यंत एकूण थकीत कर्जे २ लाख ५१ हजार ५४ कोटी रुपयांच्या घरात होती. ३१ मार्च २०१५ला हा आकडा वाढून तीन लाख नऊ हजार ३९९ कोटी रुपयांवर जाऊन पोहोचला. ३१ मार्च २०१८ला एकूण थकीत कर्जे ९ लाख ६२ हजार ६२१ कोटी रुपयांच्या घरात पोहोचली. तर, ३० नोव्हेंबर २०१८ला हा आकडा घसरून ९ लाख ४६ हजार ६२ कोटींवर पोहोचला.' सार्वजनिक बँकांवरील थकीत कर्जांचे ओझे कमी करण्यासाठी गेली चार वर्षे केंद्र सरकारतर्फे प्रयत्न करण्यात आल्याचेही जेटली यांनी नमूद केले.