किरकोळ महागाई दर ३.३९ टक्के

वृत्तसंस्था, नवी दिल्ली

गेल्या तीन महिन्यांपासून सातत्याने किरकोळ महागाईत होणाऱ्या घसरणीला डिसेंबरमध्ये ब्रेक लागला आहे. डिसेंबर २०१६ अखेर वस्तूंची किरकोळ महागाई वाढून ३.३९ टक्क्यांवर पोहोचली आहे. उत्पादित वस्तूंच्या भावात झालेली वाढ आणि खाद्यपदार्थांच्या वस्तूंची घटलेली किंमत किरकोळ महागाई वाढण्यास कारणीभूत ठरली आहे. या कालावधीत पालेभाज्यांच्या किमतीत ३३ टक्के घट दिसून आली आहे. नोव्हेंबर २०१६ अखेर किरकोळ महागाई ३.१५ टक्क्यांवर होती. कांद्यांच्या भावात मोठ्या प्रमाणात घट झाल्याने भाज्यांचे दर उतरल्याचे डिसेंबरमध्ये दिसून आले. त्यातच ऑक्टोबरमध्ये किरकोळ महागाईचा दर ३.७९ टक्क्यांवर होता.

केंद्रीय सांख्यिकी विभागातर्फे जारी करण्यात आलेल्या किरकोळ किंमत निर्देशांकावर आधारित आकडेवारीनुसार खाद्य पदार्थांच्या महागाईचा दर डिसेंबरमध्ये उणे ०.७० टक्क्यांवर होता. हाच दर नोव्हेंबरमध्ये १.५४ टक्के होता. डिसेंबर आणि नोव्हेंबरमध्ये इंधनाच्या महागाईचा दर अनुक्रमे ८.६५ टक्के आणि ७.०७ टक्के होता. ऑगस्ट २०१५नंतर प्रथमच खाण्यापिण्याच्या वस्तूंमधील किरकोळ महागाईचे दर उणे अंकांमध्ये आले आहेत.