इन्फोसिसने केली ९००० कर्मचाऱ्यांची कपात

मटा ऑनलाइन वृत्त । बेंगळुरू

देशातील आयटी क्षेत्रात दुसऱ्या क्रमांकाची कंपनी असलेल्या इन्फोसिसने ८००० ते ९००० कर्मचाऱ्यांची कपात केली आहे. 'गेल्या वर्षभरापासून इन्फोसिसने कर्मचारी कपातीची प्रक्रिया सुरू केली आहे. कामावरून काढलेल्यांमध्ये प्राथमिक स्तरावर काम करणाऱ्या कर्मचाऱ्यांचा समावेश आहे. त्यांना ऑटोमेशनमुळे काढण्यात आलंय, अशी माहिती कंपनीचे एचआर प्रमुख कृष्णमूर्ती शंकर यांनी दिली. पण काढलेले कर्मचारी सध्या अॅडव्हान्स प्रोजेक्टवर काम करत असल्याचा दावा त्यांनी केला.

'प्रत्येक तीन महिन्यात आम्ही किमान २००० कर्मचाऱ्यांची कपात करत आलो. पण कामावरून कपात करताना या कर्मचाऱ्यांना नवीन कामाचे प्रशिक्षणही देण्यात आले. विविध कामांचे ऑटोमेशन होत आहे. जसजसे ऑटोमेशन होत जाईल तशी संबंधित काम करणाऱ्या कर्मचाऱ्यांची टप्प्या-टप्प्याने कपात केली जाईल आहे', असं शंकर यांनी सांगितलं.

कंपनीची गेल्या वर्षातील व्यावसायिक कामगिरी अपेक्षेपेक्षा कमी राहिली आहे. यामुळे कर्मचारी कपातीचं ऑटोमेशनबरोबरच हेही एक कारण असण्याची शक्यता आहे. गेल्या आर्थिक वर्षात १७ हजार कर्मचाऱ्यांची कपात केली गेली होती. यंदाच्या आर्थिक वर्षात पहिल्या नऊ महिन्यांत ५,७०० कर्मचाऱ्यांची कपात करण्यात आली आहे. यामुळे डिसेंबरमध्ये इन्फोसिसच्या कर्मचाऱ्यांच्या संख्येत मोठी घट झाली आहे.

फक्त इन्फोसिसच नव्हे तर बहुतेक मोठ्या आयटी कंपन्यांनी ऑटोमेशनसाठी मोठी गुंतवणूक केली आहे. 'विप्रो कंपनीनेही प्रभावी कामासाठी ऑटोमेशनवर भर देत नोव्हेंबरपर्यंत ३, २०० कर्मचाऱ्यांची कपात केली आहे. मार्चपर्यंत एकूण ४,५०० कर्मचाऱ्यांची कपात करण्याचे विप्रोचे लक्ष्य आहे. पारंपरिक पद्धतीमुळे होत असलेले वेळखाऊ काम ऑटोमेशनमुळे वेगवान झाले आहे. तसंच यामुळे कंपनीचा नफा वाढवण्यात मदत होतेय', असं विप्रोचे ग्लोबल एचआर प्रमुख सौरभ गोविल यांनी सांगितलं.