बँकांच्या भांडवली व्यवहारांची चौकशी

नवी दिल्ली ः सरकारी बँकांनी भांडवल बाजारात केलेल्या किंवा या बँका करत असलेल्या व्यवहारांची चौकशी बाजार नियंत्रक सेबी आणि दोन्ही शेअर बाजार यांनी सुरू केली आहे. यामध्ये बँकांकडून केल्या जाणाऱ्या इक्विटी व डेरिव्हेटिव्ह व्यवहारांमध्ये काही गैरप्रकार तर झाले नाहीत ना, हे प्रामुख्याने तपासले जात आहेत.

काही सरकारी बँकांकडून गुंतवणूकदारांची दिशाभूल करणारी पत्रे पाठवली गेली आहेत. या पत्रांवर सेबीचे बोधचिन्ह असून राष्ट्रीय शेअर बाजाराच्या मायन्याने ही पत्रे तयार करण्यात आल्याचे उघड झाले आहे. ही पत्रे व्हॉट्सअॅपसह अन्य सोशल मीडियावरून २१ फेब्रुवारी रोजी पाठवली गेली होती. ही पत्रे खोटी असल्याचे उघड झाल्यामुळे आता या पत्रांच्या साह्याने इक्विटी किंवा डेरिव्हेटिव्ह व्यवहार केले गेले आहेत किंवा काय, याचा छडा सेबी लावत आहे. ही पत्रे गुंतवणूकदारांना नेमकी कशा पद्धतीने पाठवली गेली याची चौकशी दूरसंचार विभागाकडेही करण्यात येत आहे. अशी पत्रे सोशल मीडियावरून फिरत असल्याचे लक्षात आल्याबरोबर राष्ट्रीय शेअर बाजाराने आपण अशा प्रकारचे कोणतेही पत्र प्रसिद्ध केले नसल्याचे स्पष्ट केले आहे.