गुंतवणूकदारांना बसला १.६ लाख कोटींचा फटका

वृत्तसंस्था, मुंबई रिझर्व्ह बँकेचे गव्हर्नर डॉ. रघुराम राजन यांनी मंगळवारी पतधोरणाचा आढावा जाहीर केल्यानंतर फायदा मिळवण्यासाठी झालेली विक्री आणि जागतिक मंदीच्या संकेतांमुळे मुंबई शेअर बाजाराचा निर्देशांक (सेन्सेक्स) ५१६ अंकांनी घसरून २४,८८३ अंकांवर बंद झाला. तर, राष्ट्रीय शेअर बाजाराचा निर्देशांक (निफ्टी) १५१ अंकांनी घसरून ७,६०३च्या पातळीवर बंद झाला. शेअर बाजारातील या घसरणीमुळे दिवसभरात गुंतवणूकदारांचे १.६ लाख कोटी रुपये बुडाले.

सत्रांतर्गत व्यवहारांमध्ये बँकिंग क्षेत्रातील शेअरमध्ये मोठ्या प्रमाणात घसरण पाहायला मिळाली. बँकिंग निर्देशांक चार टक्क्यांनी घसरला. ओरिएंटल बँक ऑफ कॉमर्स आणि कॅनरा बँकेच्या शेअरमध्ये सहा टक्क्यांची घसरण झाली. युनियन बँक, बँक ऑफ इंडिया, आंध्र बँक आणि स्टेट बँकेचे शेअर पाच टक्क्यांनी घसरले. या शिवाय वाहन उद्योगाच्या निर्देशांकातही ३.१२ टक्क्यांची घट झाली. बिहार सरकारने सर्वप्रकारच्या दारुला प्रतिबंध करण्याचा निर्णय घेतल्यानंतर मद्य उद्योगाच्या शेअरमध्येही मोठी घसरण पाहण्यास मिळाली. युनायटेड स्पिरीट्स, रेडिको खेतान, ग्लोबल स्पिरिट्स आणि युनायटेड ब्रुअरिज होल्डिंग आदी कंपन्यांच्या शेअरमध्ये १ ते ४ टक्के घसरण झाली.