ईटी वृत्त, नवी दिल्ली
आयआरसीटीसीच्या (इंडियन रेल्वे केटरिंग अँड टूरिझम कॉर्पोरेशन) वेबसाइट अथवा अॅपवरून रेल्वे तिकीटांचे आरक्षण करणे यापुढे अधिक सुलभ होणार आहे. आयआरसीटीसी लवकरच आय-पे ही स्वत:ची पेमेंट प्रणाली कार्यान्वित करणार असून त्याद्वारे कोणत्याही बँकेच्या डेबिट वा क्रेडिट कार्डाने तिकिटांची रक्कम भरता येईल. आयआरसीटीसीमध्ये सद्यस्थितीत स्टेट बँक, इंडियन ओव्हरसीज बँक, कॅनरा बँक, एचडीएफसी, अॅक्सिस आणि युनायटेड बँक ऑफ इंडिया या बँकांच्याच कार्डने तिकीट आरक्षण करता येते. यामुळे अन्य बँकांची कार्ड बाळगणाऱ्या प्रवाशांची कुचंबणा होत होती. या पार्श्वभूमीवर आयआरसीटीसीने आय-पे ही नवी सुविधा आणली आहे. ही सुविधा १८ ऑगस्टपासून सुरू होईल. तिकीट रद्द झाल्यास या सुविधेमुळे परताव्याची रक्कमही विनाविलंब मिळेल.