'या'ने श्रीमंतीत बिल गेट्सलाही टाकलं मागे

मटा ऑनलाइन वृत्त । नवी दिल्ली

जगातली सर्वात मोठी ई-कॉमर्स कंपनी अॅमेझॉनचे संस्थापक आणि सीईओ जेफ बेजॉस यांनी श्रीमंतीच्या बाबतीत बिल गेट्सचा १८ वर्षांपूर्वीचा विक्रम मोडला आहे. ब्लॅक फ्रायडे सेल्सनंत कंपनीचे शेअर्स २ टक्के वाढल्याने बेजॉस यांची संपत्ती १००.३ अब्ज डॉलर्स (सुमारे ६,४६,५७५ कोटी रुपये)वर पोहोचली आहे. १०० डॉलर्सपेक्षा अधिक संपत्ती असणारी बोजॉस ही जगातली दुसरी व्यक्ती आहे. यापूर्वी १९९९ मध्ये मायक्रोसॉफ्टचे संपादक बिल गेट्स यांनी हा विक्रम केला होता.

यावर्षी २३ नोव्हेंबरपर्यंत बेजॉस यांच्या संपत्तीत ३२.६ अब्ज डॉलर्सची वाढ झाली आहे. या आठवड्यात अॅमेझॉनला ५ टक्के वाढ मिळाली आहे.

ब्लूमबर्गनुसार, ६२ वर्षीय बिल गेट्स यांच्याकडे अजूनही ८६.८ अब्ज डॉलर्सची संपत्ती आहे. त्यांनी मायक्रोसॉफ्टचे ७० कोटी शेअर्स, २.९ अब्ज डॉलर्स रोख आणि अन्य संपत्तीचे दान केले नसते तर ते आतापर्यंत १५० अब्ज डॉलर्सचे मालक असते!