आर्थिक निकालानंतरच वेतनवाढ

मुंबई ः पहिल्या तिमाहीचे आर्थिक निकाल लागल्यानंतरच वेतनवाढीचा विचार केला जाईल, असे जेट एअरवेजने आपल्या वैमानिकांना सांगितले आहे. कंपनीसाठी वैमानिकांनी वैयक्तिक त्याग करावा, असेही कंपनीने सुचवले आहे.

आपल्या अस्तित्वाची २४ वर्षे पूर्ण करणाऱ्या जेट एअरवेज सध्या आर्थिक प्रश्नांशी तसेच तीव्र स्पर्धेशी झुंज देत आहे. त्यामुळे चालू आर्थिक वर्षासाठी वेतनवाढ रोखण्याचा निर्णय जेट एअरवेजने घेतला होता. असाच निर्णय कंपनीने २०१६-१७ या मागील आर्थिक वर्षातही घेतला होता. यावरून कंपनीच्या सुमारे १५०० वैमानिकांमध्ये असंतोष पसरला आहे. तसेच काही मुद्द्यांवर कंपनीचे व कर्मचाऱ्यांचे मतभेद आहेत. कर्मचाऱ्यांचा असंतोष अधिक वाढू नये यासाठी कामगिरी सुधारण्याचा आटोकाट प्रयत्न केला जात असल्याचेही जेट एअरवेज व्यवस्थापनाने स्पष्ट केले आहे.