Jet Airways: 'जेट'वरील आर्थिक संकट गडद

नवी दिल्ली :

जेट एअरवेज या विमान कंपनीवरील आर्थिक संकट अधिक गडद झालं असून भाडं चुकतं न केल्याने भाडेपट्ट्यावर घेतलेल्या चार विमानांना ब्रेक लावण्यात आला आहे. परिणामी सोमवार रात्रीपासून आतापर्यंत जेटची किमान २० उड्डाणं रद्द करावी लागली आहेत.

दिल्ली, मुंबई, बेंगळुरू आणि चेन्नई विमानतळावर जेटच्या ताफ्यातील बोईंग ७३७ विमानं थांबवून ठेवण्यात आली आहेत. सूत्रांच्या म्हणण्यानुसार, चारही विमानतळावर प्रत्येकी एक विमान थांबवण्यात आलं आहे. विमानांच्या मूळ मालकांनी विमानं ताब्यात घेण्याचे पाऊल उचलल्याचेही सांगितले जात आहे.

जेट एअरवेजने या संकटातून मार्ग काढण्यासाठी विविध कंपन्या व वित्तसंस्थांशी संपर्क साधला असला तरी प्रत्यक्ष देणी चुकती केल्यानंतरच यातून मार्ग काढता येणार आहे.

जेटच्या ताफ्यात १२३ विमानं असून सध्या किती विमानं प्रत्यक्ष सेवेत आहेत, हे कंपनीकडून अद्याप स्पष्ट करण्यात आलेलं नाही. रोखीची चणचण असल्याने काही विमानांचे उड्डाण थांबवावे लागले आहे, असे कंपनीच्या वेबसाइटवर नमूद करण्यात आले आहे.