अर्थमंत्री घेणार बँकांच्या एनपीएची गंभीर दखल

सरकारी बँकप्रमुखांना ६ जून रोजी भेटणार

वृत्तसंस्था, नवी दिल्ली

सरकारी बँकांची वाढती अनुत्पादक कर्जे (एनपीए) आणि त्यामुळे बँकांचा सातत्याने वाढणारा तोटा याची गंभीर दखल केंद्रीय अर्थमंत्री अरुण जेटली यांनी घेतली आहे. या गोंधळाच्या पार्श्वभूमीवर सरकारी बँकप्रमुखांची ते ६ जून रोजी भेट घेणार आहेत. या बैठकीत सरकारी बँका तसेच वित्तसंस्था यांच्या वार्षिक वाटचालीचा आढावाही घेतला जाणार आहे. २०१५-१६ या आर्थिक वर्षाच्या चौथ्या तिमाहीअखेर काही सरकारी बँकांचा एकूण तोटा २० हजार कोटी रुपये झाला आहे. अद्याप कॅनरा बँक आणि भारतीय स्टेट बँक यांनी आर्थिक निकाल घोषित करणे बाकी आहे. बँकांच्या ताळेबंदाचा दर्जाही घसरत चालला आहे. त्याचाही लेखाजोखा या बैठकीत घेतला जाईल. याशिवाय प्रधानमंत्री जीवनज्योती विमा योजना, प्रधानमंत्री सुरक्षा विमा योजना व अटल पेन्शन योजना या योजनांचाही आढावा जेटली घेणार आहेत.