जिओची ग्राहकसंख्या २० कोटींवर

मुंबई : रिलायन्स जिओने २१ महिन्यांत २० कोटी ग्राहकांचा टप्पा ओलांडला आहे. या मोबाइल सेवा पुरवठादार कंपनीची ग्राहकसंख्या २१.५३ कोटींवर पोहोचली आहे. जिओच्या ग्राहकांनी ६४२ कोटी जीबीचा विक्रमी डेटावापर केला असून प्रतिग्राहक दरमहा डेटा वापर १०.६ जीबी आहे.

एप्रिल ते जून या कालावधीत कंपनीला ८ हजार १०९ कोटी रूपयांचा कार्यगत महसूल (ऑपरेटिव्ह इनकम) मिळाला असून गेल्या आर्थिक वर्षाच्या पहिल्या तिमाहीच्या तुलनेत महसुलात १३.८ टक्क्यांनी वाढ झाली आहे. जिओच्या सेवेतून बाहेर पडण्याचे ग्राहकप्रमाण अन्य कंपन्यांच्या तुलनेत सर्वांत कमी म्हणजे दरमहा ०.३० टक्का असल्याचे कंपनीने म्हटले आहे. दोन वर्षांपेक्षा कमी कालावधीत एवढी ग्राहकसंख्या मिळविण्याची कामगिरी अद्याप कोणत्याही कंपनीने केलेली नाही, अशी प्रतिक्रिया रिलायन्स इंडस्ट्रिजचे अध्यक्ष मुकेश अंबानी यांनी व्यक्त केली.