'कार्वी ब्रोकिंग'ची सदस्यता रद्द; थकबाकी मिळवण्यासाठी अर्ज करण्याचे 'बीएसई'चे गुंतवणूकदारांना आवाहन

वृत्तसंस्था, नवी दिल्ली : राष्ट्रीय शेअर बाजाराने (एनएसई) कार्वी स्टॉक ब्रोकिंग या ब्रोकिंग कंपनीची सदस्यता रद्द केल्यानंतर बुधवारी मुंबई शेअर बाजारानेही (बीएसई) कार्वीची सदस्यता रद्द केली. एनएसईने २३ तारखेला कार्वीवर सदस्यत्व रद्द केल्याची कारवाई केली होती.

बँकिंग सेवा ठप्प; देशव्यापी बंदला राज्यभरातील बँक कर्मचाऱ्यांचा उत्स्फूर्त प्रतिसाद
सदस्यता रद्द केल्यानंतर गुंतवणूकदारांना दिलासा देत मुंबई शेअर बाजाराने एका परिपत्रकात सांगितले आहे की, कार्वीकडे थकीत रक्कम किंवा थकबाकी असलेल्या गुंतवणूकदारांनी ती परत मिळवण्यासाठी ९० दिवसांच्या आता मुंबई शेअर बाजाराकडे अर्ज करावा. याचा अर्थ हा अर्ज २२ फेब्रुवारी २०२१ पर्यंत करता येणार आहे. मुंबई शेअर बाजाराने कार्वी स्टॉक ब्रोकिंग लिमिटेडला डिफॉल्टर जाहीर करून तिच्यावर व्यवहारबंदीची कारवाईही केली आहे.

सोने-चांदीमध्ये तेजी ; जाणून घ्या आजचा सराफाचा दर
कार्वीने अनधिकृतरीत्या आपल्या ग्राहकांचे रोखे स्वतःच्या डिमॅट खात्यात हस्तांतर केले. यासाठी या ब्रोकिंग कंपनीने ग्राहकांनी दिलेल्या मुखत्यारपत्रांचा (पीओए) गैरवापर केल्याचे उघड झाले आहे. यापूर्वी नोव्हेंबर २०१९ मध्ये सेबीने कार्वीवर नवीन ग्राहक घेण्यावर बंदी घातली होती. त्यावेळी कार्वीने ग्राहकांच्या दोन हजार कोटींहून अधिक रोखे परस्पर वापरल्याचे सेबीला आढळून आले होते.