‘किंगफिशर’समूहाचे लेखापरिक्षक अडकणार

‘आयसीएआय’कडून ताळेबंद चौकशीला वेग

वृत्तसंस्था, नवी दिल्ली देशातील चार्टर्ड अकाउंटंटची शिखर संस्था असणाऱ्या ‘इन्स्टिट्यूट ऑफ चार्टर्ड अकाउंटंट्स ऑफ इंडिया’ने (आयसीएआय) विजय मल्ल्या यांच्या काही कंपन्यांचे वित्तीय ताळेबंद तपासायला सुरुवात केली आहे. त्याचबरोबर लेखापरिक्षकांनी केलेल्या शिफारसीही तपासण्यात येतील. काही गडबड आढळल्यास त्यांच्यावर कारवाईचे आदेशही ‘आयसीएआय’ला देण्यात आले आहेत.

मल्ल्या यांच्या किंगफिशर समूहातील काही कंपन्यांच्या ताळेबंदांचे पुनर्लेखापरिक्षण करण्यासाठी ‘आयसीएआय’ची नेमणूक करण्यात आली आहे. मल्ल्यांच्या कंपन्यांचे ज्या लेखापरिक्षकांनी या पूर्वी लेखापरिक्षण केले आहे, त्यांचीही चौकशी या निमित्ताने करण्यात येणार आहे. तसेच, ताळेबंदामध्ये काही संशयास्पद घडामोडी अथवा गडबड आढळल्यास त्वरित कारवाईचे आदेशही ‘आयसीएआय’ला देण्यात आले आहेत. ‘आयसीएआय’च्या ‘फायनान्शियल रिपोर्टिंग रिव्ह्यू बोर्डा’तर्फे (एफआरआरबी) सध्या मल्ल्यांच्या कंपन्यांच्या कागदपत्रांची छाननी सुरू करण्यात आली आहे. .. आर्थिक बाबींची तपासणी सुरू

‘आयसीएआयच्या फायनान्शियल रिपोर्टिंग रिव्ह्यू बोर्डातर्फे सध्या मल्ल्या यांच्या किंगफिशर समूहातील मोजक्याच कंपन्यांच्या ताळेबंदांची तपासणी सुरू करण्यात आली आहे. ताळेबंदात करण्यात आलेल्या गैरव्यवहारांवर बोट ठेवले जाणार आहे. ताळेबंदाची निर्मिती करताना काही अनैतिक बाबींचा आधार घेण्यात आला आहे अथवा नाही, याचीही चौकशी एफआरआरबीमार्फत करण्यात येईल, ’अशी माहिती ‘आयसीएआय’चे राष्ट्रीय अध्यक्ष एम. देवराज रेड्डी यांनी दिली. .. ‘दोषी सदस्यांवर कारवाई होणार’

कर्जाऊ घेतलेल्या रकमेची वेळेत पूर्तता न केल्यास किंवा तसे सल्ले दिले गेल्यास लेखापरिक्षकाच्या भूमिकेबाबत शंका उपस्थित होण्याची शक्यता आहे. तसे झाल्यास लेखापरिक्षकाचा व्यवसाय आणि पेशा धोक्यात येऊ शकतो, अशी भीतीही देवराज रेड्डी यांनी ‘आयसीएआय’च्या सदस्यांना उद्देशून व्यक्त केली होती. मल्ल्यांच्या विविध कंपन्यांवर नेमणूक केलेल्या लेखापरिक्षकांची भूमिका शंकास्पद वाटल्यास त्यांच्यावर कारवाई करण्यात येईल, असेही रेड्डी यांनी स्पष्ट केले.