ईटी वृत्त, नवी दिल्ली
लांब पल्ल्याच्या रेल्वे प्रवासादरम्यान मिळणाऱ्या खाद्यपदार्थांची दरांसह सूची आयआरसीटीसीने (इंडियन रेल्वे कॅटरिंग अँड टूरिझम कॉर्पोरेशन लि.) प्रवाशांना देऊ केली आहे. आयआरसीटीसीच्या वेबसाइटवरून तिकीट आरक्षण करणाऱ्या प्रवाशांना ही सूची मिळणार आहे. ऑनलाइन तिकीटाच्या प्रिंटमध्ये सर्वात शेवटी ही सूची असेल, असे आयआरसीटीसीने म्हटले आहे.
राजधानीसारख्या ट्रेनमध्ये तिकिटातच खाद्यपदार्थ्यांच्या शुल्काचा समावेश असतो. मात्र अन्य अनेक गाड्यांमध्ये यासाठी प्रवाशांना वेगळे पैसे मोजावे लागतात. या खाद्यपदार्थांपोटी संबंधित कर्मचारी अतिरिक्त पैसे उकळतात अशा स्वरूपाच्या तक्रारी दाखल झाल्या होत्या. यावर उपाय म्हणून आयआरसीटीसीने ही सुविधा देऊ केली आहे.
यानुसार ऑनलाइन तिकिटाच्या प्रिंटमध्ये चहा, कॉफी, मिनरल पाणी याच्यापासून ते न्याहरी, जेवण आदींचे दर देण्यात येणार आहेत. प्रवाशांसाठी ही सुविधा फायदेशीर ठरेल, असे आयआरसीटीसीने म्हटले आहे.