मुंबईतील फ्लॅटवर कारवाई
वृत्तसंस्था, नवी दिल्ली
आयसीआयसीआय बँकेच्या माजी सीईओ आणि व्यवस्थापकीय संचालक चंदा कोचर आणि त्यांच्या कुटुंबावर अंमलबजावणी संचलनालयाने (ईडी) मोठी कारवाई केली आहे. 'ईडी'ने कोचर यांचा मुंबईतील फ्लॅट आणि पती दीपक कोचर यांची काही संपत्ती जप्त केली आहे. जप्त केलेल्या संपत्तीचे मूल्य ७८ कोटी रुपये असल्याचे वृत्त आहे. चंदा कोचर यांच्या विरोधात ही कारवाई २०१२मध्ये आयसीआयसीआय बँकेकडून व्हिडिओकॉन समूहाला देण्यात आलेल्या ३,२५० कोटी रुपये कर्जाच्या संदर्भात करण्यात आली आहे.
आयसीआयसीआय बँकेकडून कर्ज घेणाऱ्या व्हिडिओकॉन समूहाकडून कोचर यांचे पती दीपक यांच्या कंपनीमध्ये काही गोंधळ झाल्यानंतर चंदा यांनी ऑक्टोबर २०१८मध्ये राजीनामा दिला. नुकतीच त्यांनी बँकेकडून आपल्या हकालपट्टीच्या विरोधात मुंबई हायकोर्टात धाव घेतली आहे. कोचर यांनी ऑक्टोबर २०१८मध्ये लवकर निवृती घेण्याची लेखी विनंती केली होती आणि बँकेने त्या पत्राला मान्यता दिली होती. या पत्राला कोर्टाने वैध ठरवावे, असेही कोचर यांनी नमूद केले आहे.
...
ठपका काय होता?
व्हिडिओकॉन समूहाला दिलेल्या ३,२५० कोटी रुपयांच्या वादग्रस्त कर्जप्रकरणामुळे विविध चौकशींच्या फेऱ्यात सापडलेल्या आयसीआयसीआय बँकेच्या मुख्य कार्यकारी अधिकारी चंदा कोचर यांची तीस जानेवारी २०१९ला पदावरून हकालपट्टी करण्यात आली होती. संशयास्पद कर्ज प्रकरणाची चौकशी करण्यासाठी बँकेच्या लेखापाल समितीने नेमलेल्या श्रीकृष्ण समितीने सादर केलेल्या अहवालाअंती ही कारवाई करण्यात आली होती. या कर्ज प्रकरणात कोचर यांनी बँकेचे नियम तसेच, आचारसंहितेचे उल्लंघन केले असल्याचा ठपका या समितीने त्यांच्यावर ठेवला. हा अहवाल प्राप्त होताच आयसीआयसीआय बँकेने एक पत्रक प्रसिद्ध करून चंदा कोचर यांची सीईओपदावरून हकालपट्टी करण्यात आल्याचे जाहीर केले. त्यांच्याविरोधात ही चौकशी सुरू झाल्यानंतर बँकेने त्यांना सक्तीच्या रजेवर धाडले होते.
...
प्रकरण नेमके काय?
चंदा कोचर या आयसीआयसीआय बँकेच्या कर्ज समितीवर असताना २०१२मध्ये व्हिडिओकॉन समूहाला ३,२५० कोटी रुपयांचे कर्ज देण्यात आले होते. कोचर यांचे पती दीपक यांनी स्थापन केलेल्या न्यूपॉवर रीनीवेबल्स या कंपनीमध्ये व्हिडिओकॉनचे प्रवर्तक वेणुगोपाल धूत यांनी भरीव गुंतवणूक केली होती. सीबीआयने या प्रकरणी कोचर यांच्याविरोधात गुन्हा दाखल केला होता.