कोटक महिंद्रा बँकेवर छापा; ७० कोटी जप्त

मटा ऑनलाइन वृत्त । नवी दिल्ली

नोटाबंदीनंतर काळा पैसा पांढरा करण्यासाठी बँक खात्यांचा वापर करणाऱ्या बड्या धेंडांना आयकर विभागानं आज जोरदार दणका दिला. बनावट खात्यांच्या संशयावरून आयकर अधिकाऱ्यांनी आज नवी दिल्लीतील कोटक महिंद्रा बँकेवर छापा टाकला. या छाप्यात आयकर अधिकाऱ्यांनी बनावट खात्यातील ७० कोटी रुपये जप्त केले.

कोटक बँकेच्या नवी दिल्लीतील कस्तुरबा गांधी शाखेत ही बनावट खाती होती. याबाबत संशय आल्यानंतर आयकर विभागाने आज सकाळी ही कारवाई केली. कोटक महिंद्रा बँकेतील ज्या खात्यांतून ७० कोटी मिळाले, ती खाती रमेश चाँद आणि राज कुमार या दोन व्यक्तींच्या नावे आहेत. या खात्यांच्या माध्यमातून त्यांनी काळा पैसा पांढरा केल्याचा संशय आहे. मात्र या खातेधारकांनी केवायसी प्रक्रिया पूर्ण केल्याचा दावा बँकेने केला आहे. याआधी, अॅक्सिस बँकेवरही अशाच प्रकारे छापा टाकण्यात आला होता.