बँक ऑफ महाराष्ट्रचे बाँड विक्रीला

वृत्तसंस्था, नवी दिल्ली : सार्वजनिक क्षेत्रातील बँक ऑफ महाराष्ट्र (महाबँक) बाँड विक्रीतून ६०० कोटी रुपये भांडवलाची उभारणी करणार आहे. ही माहिती बँकेतर्फे मंगळवारी देण्यात आली.

याविषयी कायदेशीर बाबी पूर्ण करताना बँकेने सांगितले की, बासेल-३ मानकांची पूर्तता करण्यासाठी बँकेला भांडवलाचे नियोजन करणारी प्रक्रिया सुधारणे तसेच ती सक्षम करणे आवश्यक आहे. त्यासाठी प्रतिदेय (रिडिमेबल) अपरिवर्तनीय २ टियर बाँड बँक विक्रीला काढणार आहे. यामध्ये २०० कोटींचा बेस इश्यु असेल तर ४०० कोटींचा निर्धारित बाँडपेक्षा अधिक बाँड देण्याचा ग्रीन शू ऑप्शनही देण्यात येईल.

भारतीय बँकिंग व्यवस्थेत १ एप्रिल २०१३ पासून विविध बँका बासेल-३ मानकांची पूर्तता करत आहेत. मत्तेची गुणवत्ता सुधारणे, बँकेच्या कामकाजात सुधारणा करणे, बँकेचा नफा वाढवणे यावर या मानकांतर्गत भर देण्यात आला आहे.