‘एमसीएक्स’चे सोन्याचे वायदे

नवी दिल्ली : आघाडीचा वायदे बाजार असलेल्या मल्टि कमॉडिटी एक्स्चेंजने (एमसीएक्स) यावर्षी धनत्रयोदशीपासून (१७ ऑक्टोबर) सोन्याचे वायदे सुरू करण्यात येतील, अशी नुकतीच घोषणा केली.

धनत्रयोदशीपासून गोल्ड ऑप्शन्स या प्रकारच्या व्यवहाराची कंत्राटे तसेच एक किलो गोल्ड फ्युचर्स या दोन्ही प्रकारच्या वायद्यांना सुरुवात होईल, अशी माहिती एमसीएक्सने मुंबई शेअर बाजाराला दिली आहे. असे वायदे सुरू करण्यासाठी एमसीएक्सने जूनच्या शेवटच्या आठवड्यापासून चाचण्या घेतल्या आहेत. हे वायदे सुविहित सुरू राहावेत, यासाठी एमसीएक्सने आवश्यक ती तंत्रज्ञान सिद्धताही केली आहे.

ऑगस्ट महिन्यात भांडवल बाजार नियंत्रक सेबीने वायदे बाजारांना ऑप्शन प्रकारचे सौदे करण्यास परवानगी दिली होती.