छोट्या व्यापाऱ्यांना एमडीआर माफ

मुंबई ः भारतीय स्टेट बँकेने छोट्या व्यापाऱ्यांसाठी मर्चंट डिस्काउन्ट रेट अर्थात एमडीआर माफ करत असल्याची घोषणा सोमवारी केली. वर्षभरात २० लाख रुपये उलाढाल असणाऱ्या व्यापाऱ्यांनी स्टेट बँकेची डिजिटल पेमेंट प्रणाली वापरल्यास त्यासाठी बँकेला द्यावे लागणारे एमडीआर शुल्क ३१ डिसेंबरपर्यंत माफ केले आहे. यामुळे डिजिटल पेमेंटची सेवा पुरवणाऱ्या खासगी वित्तसंस्थांशी स्पर्धा करणे स्टेट बँकेला शक्य होणार आहे.

त्याचवेळी ग्राहकांनी पॉस मशीनच्या साह्याने किंवा डेबिट कार्ड वापरून व्यवहार केल्यास त्या प्रत्येक व्यवहारासाठी छोट्या व्यापाऱ्यांना कोणतेही शुल्क द्यावे लागणार नसल्यामुळे ग्राहकांना अतिरिक्त रक्कम द्यावी लागणार नाही. यामुळे युनायटेड पेमेंट इंटरफेससारखे (यूपीआय) नवे तंत्रज्ञान व्यापाऱ्यांना स्वीकारणे सोपे जाणार आहे. एमडीआर काढून टाकल्यामुळे छोटे व्यापारी कॅशलेस व्यवहारांना प्राधान्य देतील, असा विश्वास स्टेट बँकेने व्यक्त केला आहे.