एमडीआरबाबत रिझर्व्ह बँकेशी चर्चा

नवी दिल्ली ः रिझर्व्ह बँकेने मर्चंट डिस्काउन्ट रेट अर्थात एमडीआरचे सुसूत्रिकरण करण्यात येणार असल्याचे सूतोवाच नुकतेच केले. त्यानंतर आता सरकारनेही त्यासाठी पुढाकार घेतला असून, ०.२५ टक्क्यांवरून एक टक्का व त्यापुढे गेलेला एमडीआर कमी कसा करता येईल, त्यासाठी रिझर्व्ह बँकेशी चर्चा करायचे ठरवले आहे. रिझर्व्ह बँकेशी चर्चा करून एमडीआर कमी करण्याविषयी एक उपाययोजना ठरवली जाणार आहे, असे केंद्रीय अर्थ मंत्रालयातील एका अधिकाऱ्याने सांगितले.

सात टक्के विकास होणारच

नवी दिल्ली ः भारतीय अर्थव्यवस्थेतील मांद्य संपण्याची चिन्हे असून आर्थिक विकासदर (जीडीपी) सात टक्के होणारच, असा विश्वास स्टँडर्ड चार्टर्डने व्यक्त केला आहे. येत्या काही तिमाहींत हा विकादर सात टक्के होईल आणि पुढील काही वर्षांत तो ७.५ टक्के किंवा त्याहीपेक्षा अधिक होईल, असेही या संस्थेने म्हटले आहे. येत्या चार ते सहा वर्षांत वाढीचा वेग हळूहळू पूर्वपदावर येईल. हा आर्थिक सुधारणांचा परिणाम असेल, असेही स्टँडर्ड चार्टर्डने आपल्या अहवालात नमूद केले आहे.