सायरस मिस्त्री कोर्टात जाणार!

मटा ऑनलाइन वृत्त । मुंबई

'टाटा' समूहाच्या अध्यक्षपदावरून तडकाफडकी बाजूला करण्यात आलेले सायरस मिस्त्री यांनी टाटा सन्सच्या संचालक मंडळाच्या निर्णयाला मुंबई उच्च न्यायालयात आव्हान देण्याच्या हालचाली सुरू केल्या आहेत. त्याबाबत मिस्त्री यांच्या निकटवर्तीयांची दिग्गज कायदेतज्ज्ञांशी बोलणी सुरू असल्याचं समजतं.

टाटा समूहाच्या प्रमुखपदावरून मिस्त्री यांना दूर करून समूहाची सूत्रे पुन्हा रतन टाटा यांच्याकडं देण्याचा निर्णय काल जाहीर करण्यात आला. या निर्णयामुळं उद्योग जगतात खळबळ उडाली. मिस्त्री यांनाही संचालक मंडळाच्या निर्णयाचा धक्का बसला असून त्या विरोधात दाद मागण्याचा त्यांचा विचार आहे. 'मिस्त्री यांना हटवण्याचा संचालक मंडळाचा निर्णय बेकायदा आहे. हा निर्णय घेताना कंपनी कायद्यातील तरतुदींचे उल्लंघन करण्यात आलं आहे. त्यामुळं आज किंवा उद्यापर्यंत हे प्रकरण न्यायालयापुढं नेलं जाईल,' असं मिस्त्री यांच्या वर्तुळातील ज्येष्ठ वकिलांनी सांगितलं. माजी सॉलिसिटर जनरल मोहन परासरन व ज्येष्ठ कायदेतज्ज्ञ विराग तुळजापूरकर हे या प्रकरणात मिस्त्री यांची बाजू मांडण्याची शक्यता आहे.

कोणत्या मुद्द्यांवर मिस्त्री आव्हान देणार?

> टाटा सन्सच्या आर्टिकल्स ऑफ असोसिएशनमधील कलम '१२१ ब' नुसार अध्यक्षपदावरील व्यक्तीला बदलायचे झाल्यास कंपनीच्या शेअरहोल्डर्सना १५ दिवस आधी नोटीस द्यावी लागते. संचालक मंडळानं अशी कोणतीही नोटीस दिली नव्हती.

> मिस्त्री यांना बाजू मांडण्याची संधीही देण्यात आली नाही.

> अध्यक्ष बदलाचा निर्णय घेताना नैसर्गिक न्यायतत्वाचा भंग झाला आहे.

> संचालक मंडळाचा निर्णय अन्यायकारक असून मोठ्या शेअरहोल्डर्सधारकांच्या दडपशाहीचं द्योतक आहे.