जगाच्या बाजारात भारताची पत वाढली!

मटा ऑनलाइन वृत्त । नवी दिल्ली

नोटांबदी, जीएसटीसारख्या अर्थव्यवस्था ढवळून काढणाऱ्या निर्णयांमुळं टीकेचं धनी ठरलेल्या मोदी सरकारला जागतिक पत मानांकन संस्था 'मूडीज'नं मोठा दिलासा दिला आहे. भारताच्या जागतिक पत क्रमवारीत (क्रेडिट रेटिंग) 'मूडीज'नं एका क्रमांकाची सुधारणा केली आहे. त्यामुळं जगाच्या बाजारात भारताची पत वाढली आहे. जागतिक बँकेच्या उद्योगस्नेही देशांच्या यादीत १३०व्या स्थानावरून थेट १००व्या क्रमांकावर झेप घेतल्यानंतर भारताला मिळालेलं हे दुसरं यश आहे.

यापूर्वी, २००४मध्ये मूडीजनं भारताच्या क्रेडिट रेटिंगमध्ये सुधारणा केली होती. त्यानंतर तब्बल १३ वर्षांनंतर भारताला ही मजल मारता आली आहे. विशेष म्हणजे, ज्या आर्थिक निर्णयावरून सरकारवर टीकेची झोड उठली होती, तेच निर्णय यासाठी कारणीभूत ठरले आहेत. मोदी सरकारच्या जीएसटी, नोटाबंदी, डायरेक्ट बेनिफिट ट्रान्सफर, आधार लिंकिंगच्या निर्णयांचं 'मूडीज'नं कौतुक केलं आहे. 'मूडीज'नं क्रेडिट रेटिंगमध्ये सुधारणा केल्यामुळं भारताला मोठा फायदा होणार आहे. केंद्र सरकार व भारतीय कंपन्यांना जागतिक बाजारातून स्वस्त दरानं कर्ज मिळू शकणार आहेत.

शेअर बाजार उसळला!

'मूडीज' भारताचं क्रेडिट रेटिंग वाढवल्याचे सकारात्मक पडसाद लगेचच शेअर बाजारात उमटले. मुंबई शेअर बाजाराचा निर्देशांक ३८२ अंशांनी वधारून थेट ३३ हजार ३८८ वर पोहोचला आहे. तर, निफ्टी ११० अंशांनी वधारून १० हजार ३२४ अंशावर स्थिरावला आहे.