घोषित संपत्तीत वाढ नाही

नवी दिल्ली ः अघोषित उत्पन्न घोषित करण्यासाठी सरकारने राबवलेल्या योजनेअंतर्गत (आयडीएस) ६५ हजार २५० कोटी रुपये सरकारी तिजोरीत जमा झाले आहेत. परंतु या योजनेअंतर्गत उत्पन्न घोषित करण्याची ३० सप्टेंबर ही तारीख उलटून गेल्यावर मात्र नवे उत्पन्न घोषित झालेले नाही. आयडीएसमध्ये आतापर्यंत ६४ हजार २७५ लोकांनी दडवलेले उत्पन्न जाहीर केले आहे.

वरील आकडेवारी ही प्राथमिक असून पोस्टाद्वारे घोषित झालेल्या संपत्तीचे मोजमाप सुरू असून लवकरच अंतिम आकडेवारी समजेल, असे केंद्रीय अर्थमंत्री अरुण जेटली यांनी सांगितले आहे. अंतिम मुदत संपल्यानंतर नव्याने उत्पन्न जाहीर करण्यास फारसे कोणी पुढे आलेले नाही, याला या योजनेशी संबंधित कर अधिकाऱ्यांनीही दुजोरा दिला आहे. उत्पन्न जाहीर केलेल्या लोकांकडून आयकर वसूल केल्यानंतर त्याची आकडेवारी प्रत्यक्ष करमंडळाकडून नोव्हेंबरमध्ये प्रसिद्ध केली जाईल, असेही या अधिकाऱ्यांनी सांगितले आहे.

उत्पन्न घोषित केलेल्यांना या उत्पन्नावर ४५ टक्के कर व दंड भरावा लागणार आहे. ही रक्कम एकूण तीन हप्त्यांत, ३० सप्टेंबर २०१७पर्यंत भरायची आहे. यापैकी किमान ५० टक्के रक्कम चालू आर्थिक वर्षात सरकारजमा करणे आवश्यक आहे.