शुल्कचुकवेगिरीपायी अटकेत सूट

दोन कोटींपेक्षा कमी उत्पादन शुल्क चुकवल्यास सराफांवर फिर्यादही नाही

वृत्तसंस्था, नवी दिल्ली एखाद्या सराफाकडून, दागिने उत्पादकाकडून दोन कोटींपेक्षा कमी रकमेच्या उत्पादन शुल्काचा भरणा केला गेला नसेल, अर्थात उत्पादन शुल्क चुकवले गेले असेल तरीही महसूल अधिकाऱ्याकडून संबंधित सराफाला अटक होणार नाही किंवा त्याच्यावर फिर्यादही दाखल केली जाणार नाही, असे केंद्रीय अर्थ मंत्रालयाने स्पष्ट केले आहे.

याखेरीज एक कोटी रुपयांपेक्षा कमी रकमेचे उत्पादन शुल्क भरणाऱ्या दागिने उत्पादकाचे उत्पादन शुल्क लेखा परीक्षण पहिली दोन वर्षे केले जाणार नाही, असेही अर्थ मंत्रालयाने स्पष्ट केले आहे. त्याचवेळी एक कोटीपेक्षा अधिक व तीन कोटींपेक्षा कमी शुल्कभरणा असलेल्या दागिने उत्पादकाचे उत्पादन लेखा परीक्षण दोन वर्षांतून एकदा केले जाऊ शकते. त्याचप्रमाणे तीन कोटी रुपयांपेक्षा अदिक उत्पादन शुल्क भरणा करणाऱ्या सराफांचे उत्पादन लेखा परीक्षण दरवर्षीही केले जाऊ शकते, असे अर्थ मंत्रालयाने सांगितले आहे.

सरकारने केंद्रीय अर्थसंकल्पात दागिन्यांवर एक टक्का उत्पादन शुल्क लागू केल्यावर देशभर त्याविरोधात निदर्शने झाली. यामुळे सरकारने सराफा उद्योगाशी संवाद साधण्यासाठी लाहिरी समितीची नियुक्ती केली. या समितीच्या शिपारसी सरकारने मान्य केल्या असून त्यानुसार सराफांसाठी सुधारित नियम लागू केले आहेत. यावर आधारित अधिसूचना व परिपत्रके केंद्रीय उत्पादन व सीमा शुल्क मंडळाने (सीबीईसी) जारी केली आहेत.