आइस्क्रिम, तंबाखु उद्योग तोट्यात

नवी दिल्ली ः आइस्क्रिम, पान मसाला व तंबाखुजन्य उत्पादनांच्या उत्पादकांना जीएसटी लागू झाल्यावरही कम्पोझिशन योजनेचा लाभ घेता येणार नाही. केंद्रीय अर्थ मंत्रालयाने बुधवारी प्रसिद्ध केलेल्या अधिसूचनेत हे स्पष्ट करण्यात आले आहे.

कम्पोझिशन योजनेअंतर्गत ७५ लाख रुपयांपेक्षा कमी वार्षिक उलाढाल असणाऱ्या उत्पादकांना कमी टक्के जीएसटी भरण्याची सुविधा मिळणार आहे. मात्र ही सुविधा आइस्क्रिम, पान मसाला व तंबाखुजन्य उत्पादनांच्या उत्पादकांना लागू होणार नाही. अधिसूचनेनुसार, आइस्क्रिम, खाण्यायोग्य बर्फ (कोको असलेला किंवा नसलेला) यांना कम्पोझिट लेवी योजना लागू होणार नाही. त्याचप्रमाणे तंबाखु व तंबाखुला पर्याय असणाऱ्या उत्पादनांची निर्मिती करणाऱ्या कंपन्यांनाही ही योजना लागू होणार नाही.

कम्पोझिट योजनेअंतर्गत ७५ लाख रुपयांपेक्षा कमी वार्षिक उलाढाल असलेल्या उत्पादकांना उलाढालीच्या एक टक्का रक्कम जीएसटी म्हणून भरायची आहे. व्यापाऱ्यांना ही रक्कम उलाढालीच्या अडीच टक्के तर अन्य पुरवठादारांना अर्धा टक्का रक्कम जीएसटी म्हणून भरायची आहे. २० लाख रुपयांपर्यंत वार्षिक उलाढाल असलेल्या व्यवसायांना जीएसटी लागू होणार नाही.