‘विक्रीवर परिणाम होणार नाही’

वृत्तसंस्था, मुंबई

वस्तू आणि सेवा कराच्या (जीएसटी) अंमलबजावणीनंतर विक्रीवर परिणाम होणार नाही, असा आशावाद संघटित बाजारातील किरकोळ विक्रेत्यांनी व्यक्त केला आहे. जीएसटीच्या अंमलबजावणीनंतर व्यापारावर परिणाम होईल, अशी भीती व्यक्त करण्यात येत असल्याच्या पार्श्वभूमीवर किरकोळ विक्रेत्यांनी हे मत व्यक्त केले आहे.

‘रिलायन्स रिटेल’चे मुख्य अर्थविषयक खात्याचे अधिकारी अश्विन खासगीवाला म्हणाले, ‘१ जुलैपासून जीएसटीची अंमलबजावणी होणार आहे. त्यासाठी आपल्याला तयार व्हावे लागणार आहे. जीएसटीच्या अंमलबजावणीनंतर विक्रीमध्ये कुठलाही परिणाम होणार नाही, अशी आम्ही अपेक्षा करतो. तशी चिंता कुणीही व्यक्त केलेली नाही. उत्पादकांनी वस्तूंच्या किमती बदलल्यानंतर विक्रेत्यांचा नफा ठरतो. उत्पादनाच्या किमती बदलल्या, तर त्याचा भार आम्ही थेट ग्राहकांवर टाकतो.’ जुलैपासून ‘रिलायन्स रिटेल, फ्युचर ग्रुप, ट्रेंट हायपरसिटी, डी-मार्ट आदी कंपन्या आपल्या किमतींमध्ये मोठ्या प्रमाणावर कपात करण्याच्या विचारात आहेत.

‘फ्युचर ग्रुप’चे मुख्य कार्यकारी अधिकारी किशोर बियानी म्हणाले, ‘विविध उत्पादनांच्या किमती दोन ते २० टक्क्यांनी आम्ही कमी करू. आधुनिक व्यापारासाठी चांगले व्यासपीठ जीएसटी तयार करील. करांच्या दरांमध्ये गुंतागुंत नसावी. अन्यथा त्याचा परिणाम अंतिमतः ग्राहकांवर होईल.’ इतर अनेक किरकोळ विक्रेत्यांनीही जीएसटीच्या अंमलबजावणीसंदर्भात आशावाद व्यक्त केला.