नोकिया ३३१० चे धडाकेबाज आगमन

स्मार्टफोनचे आगमन होण्यापूर्वी मोबाइलच्या दुनियेतील अव्वल नाव असणाऱ्या ‘नोकिया’ने २०००मध्ये ‘नोकिया ३३१०’ हे मॉडेल सादर केले होते. २००५मध्ये ते बंद करण्यापूर्वी जगभरात १२ कोटी हँडसेटची विक्री करण्यात यश आले होते. सध्या स्पेनमध्ये सुरू असणाऱ्या मोबाइल वर्ल्ड काँग्रेसमध्ये पुन्हा ‘नोकिया ३३१०’ची धडाकेदार ‘एंट्री’ झाली. त्याविषयी...

दिवसागणिक बाजारात नवनवे स्मार्टफोन सादर होत असले तरी, ‘नोकिया ३३१०’ची सर कोणत्याही हँडसेटला आलेली नाही, हेच खरे...मोबाइलप्रेमींच्या हृदयावर एकेकाळी राज्य करणाऱ्या ‘नोकिया ३३१०’चे पुनरागमन झाले आहे. अ​तिशय टिकाऊ असणाऱ्या या उपकरणाची अत्याधुनिक आवृत्ती केवळ ४९ युरो अर्थात ३,४६८ रुपयांना उपलब्ध होणार आहे. सादरीकरण झाले असले तरी, हा फोन भारतात उपलब्ध होण्यासाठी काही काळ जावा लागणार आहे.


‘नोकिया ३३१०’ची वैशिष्ट्ये

या हँडसेटची खासियत म्हणजे पूर्वीच्या फक्त आणि फक्त नोकियाकडेच असणारा लोकप्रिय स्नेक गेमचा अंतर्भाव करण्यात आला आहे.

नोकिया २२१०ची स्क्रीन २.४ इंची असून, टूजी कनेक्टिव्हीटी देण्यात आली आहे.

बॅटरी १२०० एमएएचची असून, अंतर्गत स्टोरेज क्षमता १६ जीबीची आहे. मायक्रोएसडी कार्ड वापरून ही क्षमता ३२ जीबीपर्यंत वाढविता येते. ही बॅटरी जुन्या हँडसेटच्या तुलनेत जवळपास दसपट शक्तिशाली आहे.

या हँडसेटमध्ये वेब ब्राउजिंग करता येणार आहे.

एलईडी फ्लॅशसह दोन मेगापिक्सलचा रिअर कॅमेरा देण्यात आला आहे.

जुन्या हँडसेटप्रमाणे याचीही बॅटरी काढता येते. नव्या हँडसेटमध्ये बॅटरी चार्ज करण्यासाठी मायक्रोयूएसबीचा अंतर्भाव केला आहे.

एकदा चार्ज केल्यानंतर हँडसेटवर ५१ तास संगीताचा तर, ३९ तास रेडिओचा आनंद घेता येईल, असा कंपनीचा दावा आहे.

‘नोकिया ३३१०’ पुन्हा नव्या आणि आकर्षक स्वरूपात बाजारात सादर करण्याची किमया एचएमडी ग्लोबलने केली आहे. या शिवाय कंपनी लवकरच नोकिया ६, नोकिया ५ आणि नोकिया ३ आदी लोकप्रिय उत्पादनेही सादर करणार आहे.