नोटाबंदीचा सुधारणात्मक परिणाम

मुंबई ः नोटाबंदीचा देशाच्या अर्थव्यवस्थेवर सुधारणात्मक परिणाम दिसून येईल, असे रिझर्व्ह बँकेचे (आरबीआय) गव्हर्नर डॉ. उर्जित पटेल यांनी गुरुवारी स्पष्ट केले. यामुळे हरळून न जाता, वित्त बाजारातील चढउतारांपासून आर्थिक विकासाचे रक्षण करणेही अगत्याचे असल्याचे त्यांनी सांगितले. अर्धवार्षिक आर्थिक स्थिरता अहवालात त्यांनी हे मत मांडले आहे.

पटेल म्हणाले, येत्या काळात ५०० व १०००च्या नोटा बाजारातून काढून घेतल्याचा परिणाम होणार आहे. डिजिटल पेमेंटला यामुळे चालना मिळाली असून त्यातून व्यवहारांमध्ये उत्तरदायित्व, पारदर्शकता वाढीस लागली आहे. नोटाबंदीच्या काळात नागरिकांना त्रास सहन करावा लागल्याचे त्यांनी मान्य केले. शुक्रवारी, ३० डिसेंबरपर्यंत सर्व बँका रद्द नोटा स्वीकारतील, असेही डॉ. उर्जित पटेल यांनी स्पष्ट केले.