इंधन भडकले

वृत्तसंस्था, नवी दिल्ली

अमेरिकेचे अध्यक्ष डोनाल्ड ट्रम्प यांनी इराणशी झालेला अणुकरार रद्द केल्यामुळे आशियाई बाजारांमध्ये कच्च्या तेलाच्या दरात बुधवारी दोन टक्क्यांची वाढ झाली. आंतरराष्ट्रीय बाजारात ब्रेंट कच्च्या तेलाचे दर प्रति बॅरल ७७ डॉलरवर पोहोचले. अणुकरार रद्द केल्यामुळे कच्च्या तेलाचा पुरवठा बाधित होण्याची भीती वर्तविण्यात येत आहे. हा करार मोडण्याच्या शंकेनेच कच्चे तेल गेल्या तीन वर्षांच्या उच्चांकी पातळीवर पोहोचले होते.

इराणबरोबर २०१५मध्ये अणुकरार झाला. त्यामध्ये अमेरिकेसह ब्रिटन, चीन, फ्रान्स, जर्मनी, रशिया आणि इराणचा समावेश होता. मात्र, आता पुन्हा इराणवर निर्बंध घातल्याने बुधवारी कच्च्या तेलाच्या दरांत मोठी वाढ झाल्याचे दिसून आले. बुधवारी यूएस 'डब्ल्यूटीआय क्रूड'मध्ये २.२९ टक्क्यांची वाढ होऊन ते प्रति बॅरल ७०.६४ डॉलरवर पोहोचले. यापूर्वी सोमवारी ते ७० डॉलरवर पोहोचले होते. ही २०१४ नंतरची कच्च्या तेलातील सर्वांत मोठी वाढ ठरली आहे. त्याचवेळी ब्रेंट कच्चे तेल २.४६ टक्क्यांच्या वाढीने प्रती बॅरल ७६.६९ डॉलरवर पोचले आहे.

या क्षेत्रातील तज्ज्ञांनी दिलेल्या माहितीनुसार कच्च्या तेलाच्या दरात आणखी वाढ होण्याची शक्यता असून, आशियाई बाजारात कच्च्या तेलाचे दर प्रति बॅरल ८० डॉलरपर्यंत जाण्याची शक्यता आहे. तेलाच्या दरात सातत्याने वाढ होण्यामागे व्हेनेझुएलातील अस्थिर परिस्थिती आणि 'ओपेक'कडून घटविण्यात आलेले कच्च्या तेलाचे उत्पादन ही प्रमुख कारणे आहेत.

जगभरात पडसाद

कच्च्या तेलाचे दर वाढत असल्याचा फटका बुधवारी जगभरातील शेअर बाजारांवरही झाला. शांघाय शेअर बाजारासह (०.१ टक्का), सिडनी शेअर बाजारातही घसरण पाहायला मिळाली. या शिवाय आशियातीलही काही शेअर बाजार घसरणीसह बंद झाले.

युरो घसरला

डॉलरच्या तुलनेत युरो आणि पौंडातही बुधवारी मोठ्या प्रमाणावर घसरण पाहायला मिळाली. अन्य चलनांच्या तुलनेत डॉलर मात्र मजबूत झाला. अमेरिकी सेंट्रल बँकेचे गव्हर्नर जेरोमी पॉवेल यांच्या मते व्याजदरांत वाढ होण्याची शक्यता आहे. त्यामुळे डॉलर सातत्याने मजबूत होत आहे.