करबचतीसाठी मुदत ठेवींचा पर्याय

प्राप्तिकर कायदा १९६१च्या कलम ८० सी अंतर्गत दीड लाख रुपयांपर्यंत करवजावट घेण्याची मुभा आहे. या कलमांतर्गत बचत करण्यासाठी पीपीएफ, विमाहप्ते या पर्यायांना करदात्यांकडून अधिक पसंती दिली जाते. मात्र बहुतांश बँकांकडून करबचत मुदत ठेवींची सुविधाही उपलब्ध करून देण्यात आली आहे. या प्रकारच्या ठेवींमध्ये पैसे गुंतवल्यास करबचतीसह दीर्घकालीन गुंतवणुकीचा हेतूही साध्य होऊ शकतो. शेअर बाजाराच्या तुलनेत यात कमी परतावा मिळत असला तरी यातील जोखमीचे प्रमाण कितीतरी कमी असते हे महत्त्वाचे आहे. विविध बँकांतर्फे दिल्या जाणाऱ्या या सुविधेचा आढावा.

स्टेट बँक
स्टेट बँकेच्या करबचत मुदत ठेवींवर सर्वसाधारण ग्राहकांना ६.२५ टक्के दराने व्याज दिले जाते. ज्येष्ठ नागरिकांसाठी हा व्याजदर ६.७५ टक्के आहे. या ठेवींमध्ये एका आर्थिक वर्षात किमान एक हजार रुपये व जास्तीत जास्त दीड लाख रुपये गुंतवता येतात.

एचडीएफसी बँक
या बँकेत किमान १०० रुपयेही या प्रकारच्या ठेवींमध्ये ठेवता येतात. विशेष म्हणजे, या ठेवींचा जास्तीत जास्त कालावधी १० वर्षे आहे. या ठेवींवर सध्या ६.३ टक्के व्याज मिळते. ज्येष्ठ नागरिकांना अर्धा टक्के अधिक व्याजाची सुविधा आहे.

आयसीआयसीआय
आयसीआयसीआय बँकेच्या करबचत मुदत ठेवी या पाच ते १० वर्षे मुदतीच्या आहेत. यात सर्वसाधारण ग्राहकांना ६.६ तर, ज्येष्ठ नागरिकांना ७.१ टक्के दराने व्याज दिले जाते. यासाठी किमान १० हजार ते कमाल दीड लाख रुपयांची ठेव ठेवता येते.

अन्य बँका
बँक ऑफ बडोदाच्या करबचत मुदत ठेवींचा कालावधी ५ ते १० वर्षांचा असून त्यावर सर्वसाधारण ठेवीदार व ज्येष्ठ नागरिकांना अनुक्रमे ६.२५ व ६.७५ टक्के दराने व्याज दिले जाते. पंजाब नॅशनल बँकेच्या या प्रकारच्या ठेवींमध्ये किमान एक हजार रुपयांची अट आहे. पाच वर्षांच्या या ठेवींवर ६.३ टक्के दराने व्याज मिळते. ज्येष्ठ नागरिकांसाठी ६.७५ टक्के व्याजदर आहे.

नियम, अटी
करबचतीची सुविधा देणाऱ्या मुदत ठेवींचा कालावधी किमान पाच वर्षांचा असतो. या ठेवींवर मिळणारे व्याज मात्र करपात्र असते. या ठेवी अन्य ठेवींप्रमाणे मुदतपूर्व मोडता येत नाहीत व त्यावर कर्जही घेता येत नाही.


(स्रोत- इकॉनॉमिक टाइम्स)

Disclaimer: This article has been produced on behalf of Test Brand by Times Internet’s Mediawire team.