'अॅमेझॉन'वर मोबाइल मागवला, साबण मिळाला!

नोएडा :

एका ग्राहकाला मोबाइलऐवजी साबणाची डीलिव्हरी देण्यात आल्याने अॅमेझॉनच्या भारतातील प्रमुखासह अन्य तिघांवर ग्रेटर नोएडातील बिसरख पोलीस स्टेशनमध्ये फसवणुकीचा गुन्हा दाखल करण्यात आला आहे.

अॅमेझॉनचे भारतातील प्रमुख अमित अग्रवाल, लॉजिस्टिक फर्म दर्शिता लिमिटेडचे संचालक प्रदीप कुमार आणि रवीश अग्रवाल तसेच डीलिव्हरी बॉय अनिल अशा चौघांविरुद्ध कलम ४२० (फसवणूक), ४०६ (विश्वासघात) आणि १२० ब (कटात सहभागी होणे) अशा कलमांखाली गुन्हा दाखल करण्यात आल्याचे विभागीय निरीक्षक निशांक शर्मा यांनी सांगितले.

अॅमेझॉनकडून गंभीर दखल

अॅमेझॉन कंपनीकडेही याबाबत तक्रार करण्यात आली असून कंपनीने त्यास दुजोरा दिला आहे. तक्रारदाराला रीफंड देण्याची प्रक्रिया सुरू करण्यात आल्याचेही कंपनीने स्पष्ट केले. अॅमेझॉनवर भारतीय ग्राहकांचा जो विश्वास आहे त्याला जराही तडा जाऊ नये असे आम्हाला वाटत असून हे प्रकरण आम्ही गांभीर्याने घेतले आहे. कंपनीकडून पोलिसांना चौकशीत संपूर्ण सहकार्य केले जाणार आहे, असेही नमूद करण्यात आले.