क्रेडिट कार्डासाठी Paytmची शुल्कआकारणी रद्द

मटा ऑनलाइन वृत्त । मुंबई

पेटीएम मोबाइल वॉलेटमध्ये क्रेडिट कार्डाने पैसे भरल्यास २ टक्के शुल्क आकारण्याचा निर्णय पेटीएमने २४ तासांत मागे घेतला आहे. असे कोणतेही शुल्क आकारणार नसल्याचे पेटीएमने जाहीर केले आहे. युजर्सची सोय लक्षात घेऊन हा शुल्क आकारण्याचा निर्णय रद्द केल्याचे पेटीएमने म्हटले आहे.

अनेक वापरकर्ते क्रेडिट कार्डांचा वापर करून त्यावर मिळणारे मोफत क्रेडिट घेत होते. असे क्रेडिट घेतल्यावर ती रक्कम बँक खात्यांत जमा केली जात असे, ज्यासाठी शून्य व्यवहारशुल्क आकारले जात असे. या सुविधेचा गैरवापर बऱ्याच ग्राहकांकडून होऊ लागला होता, म्हणून शुल्क आकारण्याचा निर्णय पेटीएमने आधी घेतला होता. पण पेटीएमचा स्पर्धक असलेल्या मोबिक्विकने आपण असे कोणतेही शुल्क आकारणार नसल्याचे जाहीर केले. त्यानंतर आज पेटीएमनेही हा शुल्कआकारणीचा निर्णय रद्द केला.

'क्रेडिट कार्डाद्वारे पेटीएममध्ये पैसे भरल्यास २ टक्के पैसे आकारण्याचा निर्णय आम्ही ग्राहकांची सोय पाहून मागे घेत आहोत. जे ग्राहक क्रेडिट कार्डाद्वारे पेटीएममध्ये पैसे घेऊन प्रामाणिकपणे व्यवहार करतात, त्यांच्यासाठी हा निर्णय डोकेदुखी ठरू शकतो,' असे पेटीएमने ब्लॉगवर जाहीर केले आहे.