प्रतिनिधी, मुंबई
प्रत्येक जबाबदार व्यक्तीने स्वत:ची वैद्यकीय फाइल तयार करणे गरजेचे असून त्यामध्ये फॅमिली डॉक्टरचे नाव व क्रमांक, आरोग्यविमा सल्लागाराचे नाव व क्रमांक, विमा कंपनीचे नाव, टीपीए क्रमांक, आपल्या नजीकच्या नेटवर्क रुग्णालयाचे नाव क्रमांक, पॉलिसीचा अर्ज, वैद्यकीय अहवाल, धनादेशाची प्रत, विमा हप्ता भरल्याची पावती, विमा पॉलिसींची प्रत आदींचा समावेश असावा, असा सल्ला आरोग्यविमा व वाहनविमा क्षेत्रातील तज्ज्ञ सचिन शेडगे यांनी दिला. मुलुंड येथील महाराष्ट्र सेवा संघाच्या सभागृहामध्ये "आरोग्य व वाहन विमा घेतलात; पण गृहपाठ केलाय का?" या विषयावर त्यांचे व्याख्यान नुकतेच आयोजित करण्यात आले होते.
खर्चांचा तपशील, रुग्णालयातून सोडल्याचे कार्ड, औषधांचे बिल, डॉक्टरांचे पत्र, सर्व वैद्यकीय अहवालांची मूळ प्रत, अंतिम बिल आणि पैसे भरल्याची पावती यांसह एक कॅन्सल्ड धनादेश आदी कागदपत्रे आरोग्यविम्याचा दावा करताना आवश्यक असतात, असे त्यांनी सांगितले. आरोग्यविमा हा कॅशलेस असेल तर संबंधित रुग्णालय व विमा कंपनीत होणाऱ्या ईमेलमध्ये आपणासही समाविष्ट करावे, अशी सूचना विमाधारकाने रुग्णालयास करावी, असा सल्लाही त्यांनी दिला. विम्याचा दावा नाकारला गेल्यास कोठे तक्रार करावी याची माहिती त्यांनी दिली.
वाहनविम्याविषयीही त्यांनी विस्तृत मार्गदर्शन केले. यानंतर उपस्थित श्रोत्यांच्या शंकांचेही त्यांनी निरसन केले. अर्थ विभागाचे कार्यकर्ते सीए संजीव गोखले यांनी आरोग्यविम्यातून मिळणाऱ्या कर सवलतींची माहिती दिली.