टाइम्स वृत्त, नवी दिल्ली
पेट्रोल व डिझेलच्या विक्रमी दरवाढीमुळे गेल्या महिन्यात देशभरात नाराजी व्यक्त झाल्यानंतरही त्याच कालावधीत या दोन्ही इंधनांच्या विक्रीने नवा उच्चांक गाठल्याचे स्पष्ट झाले आहे.
मेमध्ये देशभरात ७०.५५ लाख टन डिझेलची तर २४.६० लाख टन पेट्रोलची विक्री झाली, अशी माहिती पेट्रोलियम प्लॅनिंग अँड अॅनॅलिसीस विभागाने दिली. एप्रिल १९९८नंतर एकाच महिन्यात झालेली ही सर्वाधिक इंधनविक्री ठरली आहे.
भारत हा जगातील तिसऱ्या क्रमांकाचा तेलग्राहक देश आहे. चालू वर्षात जानेवारी ते मेदरम्यान भारतात ३५.२ दशलक्ष टन डिझेलची विक्री झाली आहे. गेल्या वर्षीच्या या कालावधीच्या तुलनेत या विक्रीत सहा टक्क्यांनी वाढ झाली आहे.
पेट्रोलच्या मागणीतही सातत्याने वाढ होत असून एप्रिलच्या तुलनेत मेमध्ये पेट्रोलची विक्री ७.६ टक्क्यांनी वाढली आहे.
ग्रामीण भागांतही पेटीएमचा विस्तार
ईटी वृत्त, बेंगळुरू
डिजिटल पेमेंटमधील आघाडीची कंपनी असणाऱ्या पेटीएमने महानगरांसह ग्रामीण भागांतही विस्तार केल्याचे दिसत आहे. लहान शहरे व ग्रामीण भागांत पेटीएमचा वापर झपाट्याने वाढत आहे व ही वाढ महानगरांपेक्षाही अधिक आहे, असे या कंपनीने म्हटले आहे.
देशभरातील तीन लाख गावांतील पेटीएम अॅपचा वापर होत आहे. तसेच, लहान शहरांतील ३० लाख विक्रेते, दुकानदार या अॅपच्या माध्यमातून ग्राहकांचे पैसे स्वीकारतात. चित्रदुर्गा (कर्नाटक), अंगुल (ओडिशा), उनाव (उत्तर प्रदेश), कांग्रा (हिमाचल प्रदेश) यांसारख्या गावांमध्ये पेटीएमद्वारे डिजिटल पेमेंट करण्याचे प्रमाण महानगरांच्या तुलनेत २० टक्क्यांनी जास्त आहे, अशी माहिती या कंपनीने दिली.
यामध्ये पेटीएम क्यूआर, मनी ट्रान्स्फर आणि देयके अदा करणे या व्यवहारांचे प्रमाण सर्वाधिक आहे.
पेटीएमचे मुख्य कार्यकारी अधिकारी किरण वासिरेड्डी यांनी सांगितले की, ग्रामीण भागांतील पेटीएमचा वाढता वापर उत्साहवर्धक आहे. देशातील प्रत्येक शहर व गावातील नागरिकांपर्यंत पोहोचून त्यांना डिजिटल पेमेंटच्या सुविधेबाबत साक्षर करण्यासाठी सुरू असलेले आमचे प्रयत्न यापुढेही कायम राहातील.