सेबीकडून चौकशीला सुरुवात

नवी दिल्ली ः भांडवल बाजार नियंत्रक सेबीने पंजाब नॅशनल बँक व गीतांजली जेम्स या दोन्ही संस्थानी भांडवल बाजारात केलेल्या व्यवहारांची (ट्रेडिंग) चौकशी सुरू केली आहे. या चौकशीमध्ये ट्रेडिंग करताना वेळोवेळी उघड करण्यात आलेल्या माहितीची शहानिशाही केली जाणार आहे.

गीतांजली जेम्सवर भांडवल बाजारात व्यवहारबंदीची कारवाई जुलै २०१३मध्ये राष्ट्रीय शेअर बाजार (एनएसई) आणि सेबी यांनी केली होती. त्यावेळी गीतांजली जेम्स आणि या कंपनीचा प्रवर्तक मेहुल चोकसी यांना भांडवल व्यवहार करण्यास मनाई करण्यात आली होती. तेव्हापासून मेहुल चोकसी यांच्यावर विविध कारणांसाठी सेबीची पाळत आहे.

सेबीसमवेत दोन्ही शेअर बाजारही या चौकशीत उतरले आहेत. गीतांजली जेम्सच्या व्यवहारांतील अनियमितता, संचालक मंडळाची बैठक घेण्यात टाळाटाळ करणे, त्यासाठी सयुक्तिक कारणे न देणे अशा घटनांचीही चौकशी आता होणार आहे. सेबी आणि शेअर बाजाराबरोबरच सीबीआय व सक्तवसुली संचालनालयही पंजाब नॅशनल बँक प्रकरणाची चौकशी करत आहे.