PNB scam: मोदीविरोधात PNB हाँगकाँग कोर्टात

नवी दिल्ली

महाराष्ट्र टाइम्स.कॉम

कोट्यवधी रुपयांच्या पीएनबी घोटाळ्याचा सूत्रधार नीरव मोदी याच्या विरोधात पंजाब नॅशनल बँक आता हाँगकाँगच्या हायकोर्टात पोहोचली आहे. याशिवाय ज्या ज्या देशांमध्ये नीरव मोदी आणि मेहुल चोकशी यांची संपत्ती आणि व्यावसाय आहेत अशा सर्व देशांमध्ये पीएबी न्यायलयीन कारवाई सुरू करणार आहे.

याच महिन्यात ईडीने नीरव मोदी आणि मेहुल चोकशी यांची मालमत्ता आणि त्यांच्या व्यापाराबाबत माहिती गोळा करण्यासाठी एकूण १३ देशांमधील संबंधित अधिकाऱ्यांशी संपर्क साधला आहे. ईडीने या १३ देशांना लेटर ऑफ रोगेटरी ( एलआर) देखील जारी केले आहे. या १३ देशांमध्ये सिंगापूर, दक्षिण आफ्रिका, ब्रिटन, दुबई, बेल्झियम, अमेरिका, रशिया, फ्रान्स, चीन आणि हाँगकाँग या देशांचा समावेश आहे. या देशांकडून मिळालेल्या माहितीच्या आधारे ईडी, मोदी आणि चोकशी यांच्या परदेशातील मालमत्तेच्या स्त्रोतांचा शोध घेणार आहे.

दरम्यान, पंतप्रधान नरेंद्र मोदी यांच्या अध्यक्षतेखाली पार पडलेल्या केंद्रीय मंत्रिमंडळाच्या बैठकीत फरार आर्थिक गुन्हेगार विधेयक २०१८ या अध्यादेशास मंजुरी मिळाली आहे. राष्ट्रपतींच्या सहमतीनंतर यावर शिक्कामोर्तब होणार आहे. सरकारच्या या प्रयत्नामुळे नीरव मोदी, विजय मल्ल्यासारख्या फरार गुन्हेगारांना चाप बसण्यास मदत होणार आहे.

नीरव मोदी सध्या हाँगकाँगमध्ये असून भारताने हाँगकाँगकडे मोदीच्या प्रत्यार्पणाची मागणी केली आहे, अशी माहिती परराष्ट्र व्यवहार राज्यमंत्र्याने गेल्या संसदेच्या अधिवेशनात आपल्या लिखित उत्तरात दिली आहे. यामुळे सर्व बाजुंनी फरार आर्थिक गुन्हेगारांच्या मुसक्या आवळण्याची कायदेशीर प्रक्रिया सुरू झाली असून लवकरच सरकारने उचललेल्या पावलाचे सकारात्मक परिणाम दिसू लागतील अशी अपेक्षा व्यक्त करण्यात येत आहे.