रघुराम राजन दुसरी टर्म स्वीकारणार नाहीत!

मटा ऑनलाइन वृत्त । नवी दिल्ली

गव्हर्नर रघुराम राजन रिझव्‍‌र्ह बँक ऑफ इंडियामध्ये राहणार की जाणार यासंदर्भत गेल्या काही दिवसांपासून सुरु असलेल्या चर्चेला अखेर पूर्णविराम मिळाला आहे. राजन यांनी आरबीआयच्या कर्मचाऱ्यांना लिहलेल्या पत्रात गव्हर्नरपदाची दुसरी टर्म स्वीकारणार नसल्याचे स्पष्ट केले आहे. आरबीआयचे गव्हर्नर राजन यांचा तीन वर्षांचा कार्यकाळ येत्या ४ सप्टेंबर रोजी संपणार आहे. त्यानंतर ते पुन्हा अध्यापनाचे काम करणार आहेत. मात्र देशाला जेव्हा माझी गरज असले तेव्हा मी उपलब्ध असेन असे राजन यांनी पत्रात म्हटले आहे.

राजन यांना याआधी पुन्हा शिक्षण क्षेत्रात जाण्याची इच्छा व्यक्त केली होती. यावेळी मात्र त्यांनी थेट निर्णय घेतला आहे. काही दिवसांपूर्वी झालेल्या एका कार्यक्रमात राजन यांनी विद्यार्थ्यांना शिकवण्यासह रिसर्च आणि चिंतनासाठी शिक्षण क्षेत्रात पुन्हा जाण्याची इच्छा आहे. आरबीआयच्या गव्हर्नरपदावर नियुक्ती झाल्यानंतर त्यांनी शिकागो येथील बूथ स्कूल ऑफ बिझनेस येथून सुट्टी घेतली होती.

दरम्यान, गेल्या काही दिवसांपासून भाजपचे राज्यसभेतील खासदार सुब्रह्मण्यम स्वामी सातत्याने राजन यांच्यावर टीका करत होते. अर्थव्यवस्थेला चालना देण्यासाठी राजन व्याज दरात कपात करत नसल्याची टीका त्यांच्यावर केली जात होती. अर्थात अनेकांनी राजन यांची बाजू देखील वृत्तपत्रातून लेख लिहून मांडली होती. याशिवाय सूत्रांनी दिलेल्या माहितीनुसार खुद्द पंतप्रधान नरेंद्र मोदी राजन यांना दुसरी टर्म देण्यास उत्सुक होते.