ईटी वृत्त, नवी दिल्ली
माजी व्यवस्थापकीय संचालक राणा कपूर यांना दिलेला १.४४ कोटी रुपये परफॉर्मन्स बोनस वसूल करण्याचा निर्णय येस बँकेने घेतला आहे. बँकेच्या संचालक मंडळाने केलेल्या शिफारसीनंतर हा निर्णय घेण्यात आला.
कपूर यांना २०१५ व २०१६मध्ये हा बोनस देण्यात आला होता. हा बोनस पूर्णपणे वसूल करण्यात येणार आहे. कपूर यांना २०१७मध्ये बोनस देण्यात आला नव्हता. सदोष व्यवहार व बुडीत कर्जांच्या वाढत्या प्रमाणामुळे रिझर्व्ह बँकेने कपूर यांच्यावर गेल्या ऑक्टोबरमध्ये कारवाई करत त्यांचा कार्यकाळ संपुष्टात आणला होता. जानेवारी २०१९मध्ये कपूर यांनी पदाचा राजीनामा दिला.
या बँकेच्या कार्यपद्धतीबाबत गुंतवणूकदारांमध्ये काळजीचे वातावरण निर्माण झाल्याने रिझर्व्ह बँकेने माजी डेप्युटी गव्हर्नर आर. गांधी यांची येस बँकेच्या अतिरिक्त संचालकपदी दोन वर्षांसाठी नेमणूक केली आहे.