एकच नंबर! सावलीसारखी सोबत करणाऱ्या तरुणाच्या भन्नाट संकल्पनेवर रतन टाटा फिदा; फंडिंगची घोषणा

मुंबई: दिग्गज उद्योगपती रतन टाटा यांच्यासोबत कायम एक तरुण मुलगा असतो. हा तरुण टाटांना बिझनेस टिप्स देतो. या तरुणाच्या संकल्पना टाटांना आवडतात. गेल्या वर्षी ८४ व्या वाढदिवसाला टाटांचा या तरुणासोबतचा व्हिडीओ बराच व्हायरल झाला होता. उद्योग जगतातील मोठं व्यक्तीमत्त्व असलेल्या रतन टाटांच्या गळ्यात हात टाकून फोटो काढल्यानं तरुणाची बरीच चर्चा झाली होती. या तरुणाचं नाव शंतनू नायडू.

शंतनूचं शिक्षण कॉर्नेल विद्यापीठात झालं आहे. एमबीए केल्यानंतर शंतनू भारतात परतला. टाटा ट्रस्टच्या चेअरमन कार्यालयात शंतून उपव्यवस्थापक पदावर कार्यरत आहे. रतन टाटांनी आज 'गुडफेलोज' नावाच्या एका स्टार्ट अपमध्ये गुंतवणूक करण्याची घोषणा केली. या कंपनीचा संस्थापक शंतनू नायडूच आहे.
Rakesh Jhunjhunwala: तुम्ही होऊ शकता पुढचे राकेश झुनझुनवाला, हे आहेत गोल्डन टिप्स
गुडफेलोज नावाच्या स्टार्ट अपमध्ये गुंतवणूक करत असल्याची घोषणा रतन टाटांनी आज केली. गुंतवणुकीचा आकडा मात्र टाटांनी सांगितलेला नाही. गुडफेलोज हे ज्येष्ठ नागरिकांसाठी देशातलं पहिलं कम्पॅनियनशिप स्टार्टअप आहे. तरुण आणि शिक्षित पदवीधरांच्या मदतीनं ज्येष्ठ नागरिकांची मदत करणं हा या स्टार्ट अपचा हेतू आहे. मुंबईसह पुणे, चेन्नई आणि बंगळुरूमध्ये लवकरच गुडफेलोज सुरू होईल.

भारतात ५ कोटी वृद्ध एकटे राहतात. आयुष्याच्या जोडीदाराचं निधन, कौटुंबातील सदस्यांनी दूर लोटल्यानं अनेकांवर एकटं राहण्याची वेळ आली आहे. गुडफेलोजचं बिझनेस मॉडल एक फ्रीमियम सब्स्क्रिब्शन मॉडल आहे. सुरुवातीला पहिला महिना ज्येष्ठांना ही सेवा मोफत वापरता येईल. दुसऱ्या महिन्यानंतर ज्येष्ठांना नाममात्र सदस्यत्व शुल्क द्यावं लागेल. गुडफेलोजच्या माध्यमातून नोकरीच्या शोधात असलेल्या तरुणांना शॉर्ट टर्म इंटर्नशिपसोबतच रोजदारदेखील मिळवून देईल.