कॅनरा बँकेची दरकपात

नवी दिल्ली ः कॅनरा बँकेने बचत खात्यावरील व्याजदर अर्धा टक्का कमी करून ३.५० टक्के केला आहे. ५० लाख रुपयांपर्यंतच्या रकमेसाठी हा व्याजदर लागू होईल. त्यापुढील रकमेवर पूर्वीप्रमाणेच चार टक्के व्याज देण्यात येणार आहे. नवे व्याजदर शुक्रवापासून लागू केले गेले.

कॉसमॉस बँकेला पुरस्कार

पुणे ः कॉसमॉस सहकारी बँकेला हैदराबाद येथील इन्स्टिट्यूट फॉर डेव्हलपमेंट अँड रिसर्च इन बँकिंग टेक्नॉलॉजी या संस्थेतर्फे २०१६-१७ या वर्षासाठी बँकिंग तंत्रज्ञानातील सर्वोत्तम कामगिरीबद्दल पुरस्कार देण्यात आला. हा पुरस्कार शुक्रवारी हैदराबादेत झालेल्या सोहळ्यात आरबीआयचे डेप्युटी गव्हर्नर बी. पी. कानुनगो यांच्या हस्ते प्रदान करण्यात आला. पुरस्कार बँकेतर्फे कॉसमॉस ई-सोल्युशन्सच्या व्यवस्थापकीय संचालक आरती ढोले व बँकेच्या पश्चिम विभागीय कार्यालयाचे महाव्यवस्थापक विश्वास आगळे यांनी स्वीकारला.

१२ खात्यांचे भवितव्य

नवी दिल्ली ः कर्जे घेऊन ती बुडवणाऱ्या १२ खात्यांतून कर्जवसुलीचा आराखडा १३ डिसेंबरपर्यंत तयार करावा, असे अॅक्सिस बँकेला आरबीआयने सांगितले आहे. त्यानंतर मात्र या १२ खात्यांविरोधात कारवाई सुरू करण्यात येईल. अॅक्सिस बँकेच्या एकूण बुडित कर्जांपैकी या १२ खात्यांची रक्कम दोन हजार ४९२ कोटी रुपये आहे! या १२ खात्यांचा तपशील मात्र बँकेने दिलेला नाही.

एलआयसीला ६१ वर्षे पूर्ण

मुंबई ः भारतीय आयुर्विमा मंडळाला (एलआयसी) शुक्रवारी ६१ वर्षे पूर्ण झाली. एलआयसीने चालू आर्थिक वर्षात वैयक्तिक आयुर्विम्यासाठी चार योजना आणल्या. यामुळे योजनांची संख्या २७ झाली आहे. या ६१ वर्षांच्या वाटचालीत समाजातील सर्व उत्पन्न गटांतील व्यक्तींसाठी एलआयसीने पॉलिसी तयार केल्या आहेत. पारंपरिक विमा, टर्म विमा, पेन्शन, सूक्ष्म विमा, आरोग्य विमा, युलिप यांसारख्या योजना एलआयसी सध्या देत आहे.