खासगी बँकांना आरबीआयचे साकडे

वृत्तसंस्था, मुंबई

लघु व मध्यम उद्योजकांना भेडसावणाऱ्या रोकडतुटीच्या मुद्द्यावरून रिझर्व्ह बँकेचे गव्हर्नर शक्तिकांत दास यांनी गुरुवारी प्रमुख खासगी बँकांच्या उच्चाधिकाऱ्यांशी चर्चा केली. या बैठकीत आरबीआयचे डेप्युटी गव्हर्नरदेखील सहभागी झाले होते. गव्हर्नरपदाची सूत्रे स्वीकारल्यापासून दास यांनी या प्रकारच्या तीन बैठकी घेतल्या आहेत. यापूर्वी या मुद्द्यावरून त्यांनी सरकारी बँकांच्या अधिकाऱ्यांसोबत दोनवेळा चर्चा केली आहे.

सध्याच्या तरलता समस्येतून मार्ग काढून लघु व मध्यम उद्योजकांना करण्यात येणाऱ्या पतपुरवठ्याचा ओघ कशाप्रकारे वाढवता येईल यावर या बैठकीत चर्चा झाली, अशी माहिती या बैठकीत सहभागी झालेल्या एका अधिकाऱ्याने दिली. यापूर्वी सरकारी बँकांसोबत झालेल्या बैठकीमध्ये आरबीआयने यातील काही बँकांवर घातलेल्या आर्थिक निर्बंधाच्या मुद्द्यावरही चर्चा झाली. २१ सरकारी बँकांपैकी ११ बँकांवर आरबीआयने निर्बंध घातले आहेत.